Autoridade identifika okupante 662 utiliza espasu públiku iha Baucau
BAUCAU, 04 juñu 2024 (TATOLI) – Autoridade Administrasaun Munisipál liuhusi Diresaun Jestaun Merkadu identifika ona okupante hamutuk 662 utiliza espasu públiku iha munisípiu Baucau.
Husi númeru hirak-ne’e maoria komunidade iha Baucau Vila utiliza hodi halo negósiu hanesan loja, kioke, ofisina, uma privadu no moru protesaun ne’ebé lokaliza husi Uainiki to’o Vila Antiga, suku Bahu no kontinua to’o iha Vila Nova, suku Tirilolo.
Prosesu indentifikasaun referida hala’o bazeia ba dekretu-lei númeru 3/2024, alterasaun dahuluk husi dekretu-lei númeru 33/2008 kona-ba ijiene orden públika no dekretu-lei númeru 2/2017 kona-ba sistema no jestaun rezidus sólidu urbana.
“Kuandu notifika ona, nia kontinuasaun mak despeju administrativu, sei laiha apoiu (indemnizasaun),” Diretór Serbisu Munisipál Terra no Propriedade Baucau, Amon Correia hateten iha Vila Nova, tersa ne’e.
Husi dadus ne’ebé rekolla sei aprezenta liuhusi reuniaun iha Administrasaun Munisipál hodi fo-sai notifikasaun ba komunidade sira hanesan despaxu administrativa antes halo eviksaun.
Komunidade hirak-ne’e hetan ona informasaun verbál no sei hein notifikasaun tanba espasu públiku presiza hamamuk hodi prepara ba podér lokál no desentralizasaun administrativa hanesan hadi’a infraestrutura inklui reabilitasaun estrada urbana iha Baucau Vila.
“Hein nia kontinuasaun ba eskrita nian,” Amon Correia akresenta.
Antes ne’e, Autoridade Baucau hamutuk ho Sekretáriu Estadu Asuntu Toponímia no Organizasaun Urbana (SEATOU) ihaezekuta ona mandadu hanesan halo eviksaun ba uma komunidade hamutuk tolu iha suku Bucoli tanba konsidera nu’udar patrimóniu suku.
Jornalista : Natalino Belo
Editór : Evaristo Soares Martins
