BOBONARO, 05 juñu 2024 (TATOLI) – Komandante Autoridade Protesaun Sivíl (APC, sigla portugés) Munisípiu Bobonaro, Inspetór Polísia José Lelo Bere, alerta ba komunidade sira bainhira akontese anin-boot atu hadook-aan husi ai-hun boot sira-ne’ebé besik uma-ninin, tanba bele fó ameasa ba ema-nia vida no estraga uma.
Inspetór Polísia José Lelo Bere, informa iha tempu bailoro anin ho intensidade maka’as sempre akontese iha fatin sira hanesan suku Oe-leu, Bobonaro Vila, Marobo inklui postu administrativu Maliana.
Notísia relevante: DNMG planeia instala ekipamentu meteorolójika iha Bobonaro
“Tempu anin-boot ne’e risku liu mak ai-hún boot sira-ne’ebé besik uma, bele husu apoia ami ba tesi tia ai sira-ne’e, tanba nia risku la halimar, ai ne’e tohar bele fó ameasa ema-nia vida, estrada no ema-nia hela fatin,” nia informa ba Jornalista sira iha Maliana, tersa ne’e.
Lelo Bere, fó hanoin molok akontese anin-boot, di’akliu komunidade ho konsiénsia troka rasik kalen no ai uma-kanuk sira ne’ebé lahuk.
Nia mós husu atu labele sunu rai ai no du’ut iha to’os laran, liuliu uma ninin hodi evita akontese inséndiu.
“Iha tempu bailoro hanesan ne’e, anin boot ita sunu duut fó risku ba ita-nia hela-fatin, ita-nia uma lisan sira-ne’e, liu-liu iha parte Atabae tanba ne’e uma-tali,” nia katak.
Enkuantu iha fulan-maiu liubá, APC rejista dezastre naturál hamutuk hitu, ne’ebé ho kategoria anin sobu uma haat no inséndiu uma tolu, uma hirak-ne’ebé rejista mai husi postu administrativu Maliana, Bobonaro no Balibó.
Notísia relevante: APC alerta ba komunidade Bobonaro hadook-aan hosi fatin risku
Jornalista: Sérgio da Cruz
Editór: Evaristo Soares Martins
