iklan

EKONOMIA, BOBONARO, HEADLINE, MUNISÍPIU

DNMG planeia instala ekipamentu meteorolójika iha Bobonaro

DNMG planeia instala ekipamentu meteorolójika iha Bobonaro

Automatic Weather Station Data Tool

BOBONARO, 15 maiu 2024 (TATOLI) – Diresaun Nasionál Meteorolojia no Jeofízika (DNMG, sigla portugés), kuarta ne’e sosializa informasaun kona-ba tempu klima no introdús ekipamentu meteorolójika ba autoridade munisipál, administrasaun postu, diretór servisu munisipál no líder komunitária sira iha munisípiu Bobonaro.

Atividade ne’e fó koñesimentu ba parte autoridade munisipál, liuliu líder komunitária sira, nune’e bele hatutan informasaun ba komunidade atubele intede ekipamentu meteorolójiku ninia funsaun, tanba DNMG planeia iha tempu badak sei instala hotu ekipamentu meteorolójika iha munisípiu Bobonaro.

Diretór Nasionál DNMG, Terensio Fernandes Moniz, esplika, ba dahuluk sei instala ekipamentu Automatic Weather Station (AWS) iha kampu aviasaun ex Kodim, suku Ritabou, postu administrativu Maliana hodi rekolla dadus atmosfera kada loron.

“Iha Bobonaro ita sei tau ekipamentu Automatic Weather Station, nia atu rekolla dadus ba iha udan-been, temperatura másimu no mínimu, presaun no seluk tán,” nia informa ba jornalista sira iha salaun administrasaun munisipál Bobonaro.

Nune’e mós sei instala ekipamentu balu iha parte tasi, atubele haree kondisaun laloran, nune’e bele fó informasaun ba peskádor sira, bainhira kondisaun laloran maka’as.

Hafoin ne’e sei instala mós radar ba tempu atubele halo kalkulasaun ba udan-been monu-rai.

“Nia monu iha área ne’ebé ne’e ita bele kalkula, hanesan iha Maliana karik iha área ne’ebé, tanba durante ne’e ami fó ne’e ema jerál de’it, iha Maliana maibé la hatene iha área ne’ebé, ho ekipamentu ne’e ita bele hatene udan-ne’e Ritabou, Holsa no Raifun, ne’ebé ita nia komunidade hetan informasaun ne’e ba duni sira,” nia hateten.

Nia hatutan, DNGM mós sei instala sensor temperatura iha área rurál ne’ebé risku ba dezastre naturál hanesan; Cailaco, Bobonaro, Balibó no Atabae.

Ekipamentu ne’e sai hanesan fonte ida ba Autoridade Protesaun Sivíl (APC, sigla portugés) halo preparasaun sedu molok akontese dezastre ruma ne’ebé afeta ba komunidade.

“Sensor ne’e atu akapta rai-nakdoko, rai-halai sira-ne’e, nune’e ita bele fó alerta sedu, nune’e komunidade sira bele hadook-aan husi área sira-ne’ebé risku,” nia katak.

Ikus liu sei instala mós aplikasaun meteorolojia ba komunidade hotu asesu liu nune’e bainhira komunidade atu halo viajen ba fatin ruma, haree uluk informasaun iha telemovel bele deteta udan ka lae.

Iha fatin hanesan, Sekretáriu Autoridade Munisipál Bobonaro ba Asuntu Administrasaun Finansa, Domingos da Costa, agradese tanba DNMG bele partilla informasaun autoridade, liuliu xefe suku sira, tanba líder komunitária mak sai ponte ida atu hatutan informasaun ba komunidade sira.

Domingos akresenta, autoridade munisipál prontu apoia ba programa refere liuliu oferese rai atu halo instalasaun ba ekipamentu sira.

“Ita-nia komunidade laiha koñesimentu kona-ba ida-ne’e, sira preokupa loos ho ita-nia klima, bainbain udan mai beibeik, sira dehan udan ne’e mai demais liu, dalaruma udan ne’e mai tarde, depois iha tempu bailoro, dalaruma bailoro sedu, maibé ita-nia komunidade dehan seidauk bailoro,” nia hateten.

Programa ne’e Governu Timor-Leste hetan apoia husi parseiru sira liuhosi fundu klimátika verde ho durasaun tinan lima ne’ebé foka liu ba sistema alerta sedu.

Notísia relevante: DNMG alerta Timor-Leste hetan ameasadu bailoro naruk to’o tinan oin

Jornalista   : Sérgio da Cruz
Editór          : Evaristo Soares Martins

iklan
iklan

Leave a Reply

iklan
error: Content is protected !!