CLN Baucau rekomenda pakotementu foos iha sentru armazein seluk
BAUCAU, 05 juñu 2024 (TATOLI) – Sentru Lojístika Nasionál (CLN, sigla portugés) Armazein Rejionál Baucau rekomenda ba nasionál atu realoka foos ba sentru armazein seluk hodi kontinua halo pakotementu.
Xefe Armazein Rejionál Baucau, Domingos da Silva Sarmento, esplika, pedidu referida hato’o ba nasionál tanba konsidera atu salva estoke haree-kulit hamutuk tonelada 427.820 ne’ebé seidauk halo pakotementu tanba mákina la funsiona tanba eletrisidade avaria.
“Ha’u ko’alia tiha ona ho Diretór atu transfere, nune’e labele fó impaktu ba foos hirak-ne’e,” Xefe Armazein Rejionál Baucau hateten ih Vila Nova, kuarta ne’e.
Armazein Rejionál Baucau, to’o agora seidauk halo prosesu pakotementu tanba mákina parte isolatór hodi distribui enérjia eletrisidade hetan avaria iha tinan kotuk no seidauk halo manutensaun tanba ekipamentus mai husi Xina.
Armazein Rejionál Baucau halo ona koordenasaun ho CLN nasionál hodi buka solusaun ba problema referida hanesan realoka estoke foos ba armazein rejionál seluk nune’e bele kontinua halo pakotementu ho rajaun salva estoke foos labele estragus.
Domingos Sarmento, hateten, liuhusi kooperasaun ho Governu Xina iha ona solusaun atu hadi’a problema isolatór eletrisidade iha tempu besik ne’ebé responsabiliza kompañia internasionál Sanhai.
“Presiza hadi’a atu ita halo pakotementu,” Domingos Sarmento akresenta.
Husi totál estoke foos hamutuk 427.820 ne’ebé iha Armazein Baucau tuir panu sei halo pakotementu ba saka kilograma 25 nune’e halo distribuisaun ba merkadu ho folin tuir kbiit komunidade nian.
Jornalista : Natalino Belo
Editór : Evaristo Soares Martins
