Ema deskoñesidu tuda rahun karreta PNTL Baucau
BAUCAU, 05 juñu 2024 (TATOLI) – Ema deskoñesidu tuda rahun vidru karreta Polísia Nasionál Timor-Leste (PNTL) iha suku Uailili, postu administrativu Baucau Vila, munisípiu Baucau.
Karreta patrullamentu ho marxa Hilux xapa-matríkula 05-703 hetan tuda, bainhira membru PNTL Baucau akompaña transladasaun mate-isin husi área Bercoli, postu Venilale ho diresaun Vila Nova Baucau, maibe to’o iha área Uailili ema deskoñesidu helik iha nakukun lori fiska tiru hodi harahun vidru parte kotuk iha tuku 20:00 kalan, loron-tersa, 04 maiu 2024.
“Karreta Polísia ne’ebé hodi kalan vidru rahun ne’e tuir ita haree sira aarte-marsiál balun mak uza fiska tiru husi kotuk,” Komandante PNTL Munisípiu Baucau, Superintendente Xefe Antoninho Mauluta hateten iha Vila Nova, kuarta ne’e.
Superintendente Xefe Mauluta, esplika, autór ba kazu referida seidauk identifika maibé deskonfia membru arte-marsiál ne’ebé antes ne’e PNTL bandu atu halo konboiu akompaña mate-isin ne’ebé matebian mós nu’udar membru arte-marsiál.
PNTL Baucau deskonfia membru arte-marsiál tanba mosu dezentendimentu atu halo komboiu relasiona ho prevensaun mosu konflitu iha dalan bainhira prosesu transladasaun mate-isin nune’e iha joven balun tenta subar iha dalan halo asaun referida.
“Deskonfia sira iha planu, tanba ita haruka sira sees, maibé sira sees hodi subar-aan tiha, husi fali kotuk, sira iha intensaun duni atu atake PNTL,” Mauluta Akresenta.
PNTL Baucau liuhusi Servisu Investigasaun Kriminál (SIK) identifika ona suspeitu na’in-rua ho inisiál A no E hodi ba prosesu tuir mai, no deskonfia sei iha tán autór seluk ne’ebé daudaun sei subar-aan husi parte seguransa.
Husi kazu referida, rezulta vidru karreta patrulla PNTL Baucau mak rahun maibé la hakanek membru PNTL ne’ebé akompaña fó seguransa ba prosesu transladasaun mate-isin to’o Vila Nova, Baucau.
Jornalista : Natalino Belo
Editór : Evaristo Soares Martins
