EKONOMIA, HEADLINE

Xefe Estadu lansa ‘ai-han Timor’ hodi hakbiit ekonomia feto

Xefe Estadu lansa ‘ai-han Timor’ hodi hakbiit ekonomia feto

Prezidente Repúblika, Jose Ramos-Horta. Imajen Tatoli/Egas Cristóvão

DILI, 06 juñu 2024 (TATOLI)- Prezidente Repúblika, José Ramos Horta, sai sasin ba serimónia asinatura Memorandu Entendimentu ida-ne’ebé asina iha Palásiu Prezidensiál Nicolau Lobato, hodi ofisialmente lansa programa ‘Ai-Han Timor’ ho objetivu atu fó kbi’it ba empreza ki’ik ne’ebé hala’o husi feto sira iha Timor-Leste.

Akordu ne’e asina husi Xefe Casa Civil, Jesuína Maria Ferreira Gomes, ne’ebé reprezenta Prezidénsia Repúblika, Vise-Ministru Komérsiu Industria, Augusto Júnior Trindade, Sekretária Estadu Igualdade, Elvina de Sousa Carvalho, no Prasantha Manjuka reprezenta Kompania Heineken Timor-Leste.

Liuhusi Unidade Empoderametu Ekonómiku Feto nian iha Prezidénsia Repúblika,  programa ai-han Timor sei fornese treinamentu, ekipamentu no apoiu seluk ba emprezáriu feto sira ne’ebé hili ona to’o tinan oin mai, ho posibilidade atu halo estensaun ba tinan tolu tan bazeia ba avaliasaun.

Iha diskursu, Prezidente Ramos Horta ko’alia kona-ba inisiativa sira ne’ebé eziste ona antes programa ne’e mak hanesan sentru aprendizajen labarik nian iha Palásiu Prezidensiál no programa ‘Dapur ba Povu’ ne’ebé fornese hahán nutritivu. Iha tinan ida-ne’e, Dapur ba Povu habelar ona ba pre-eskolár LABEH no eskola sira iha Hera no Oe-Cusse, ne’ebé fó benefísiu ba labarik hamutuk 400 liu ne’ebé ladun iha priviléjiu.

“Programa ai-han Timor nian ne’e ninia objetivu mak atu fó kbiit ekonomia ba feto sira no promove produtu ai-han lokál Timor nian hodi hadi’a seguransa ai-han. Esforsu kolaborativu ida-ne’e subliña prezidente nia kompromisu ba grupu marjinalizadu sira no promove emprezariedade,” Horta katak iha nia diskursu.

Grupu benefisiáriu inisiál mak inklui feto-faluk na’in 10, ema marjinalizadu na’in neen, ema ho defisiénsia na’in rua, membru komunidade LGBTQI na’in rua, no emprezáriu na’in lima. Feto-faluk ida-ne’ebé partisipa iha programa ne’e hato’o ninia agradese, no nia hatete katak programa ne’e sei ajuda tebes ninia família.

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!