Edukasaun Lautém konvoka enkontru aban ho inan-aman kona-ba vídiu estudante espalladu
DILI, 12 juñu 2024 (TATOLI)—Servisu Edukasaun munisípiu Lautém, iha kinta (13/06), sei konvoka enkontru ho inan-aman inklui profesór sira kona-ba vídiu estudante uza farda eskola sekundáriu Jerál Lere Anan Timur, Lautém, ne’ebé espalla iha rede sosiál facebook.
Iha vídiu ho durasaun (segundu 39) ne’e hatudu katak estudante feto fuma no hemu, enkuantu mane sira tuur akompaña.
“Ita enkontru ona ho Diretór Eskola referidu ho profesór sira no ita mós konvida inan-aman atu konvoka enkontru hodi buka solusaun, nune’e bele solusiona problema ne’ebé virál ne’e,” Diretór Servisu Edukasaun munisípiu Lautém, Anibal Fernandes, informa ba Agência Tatoli, via telefónika, tersa ne’e.
Notísia relevante : Edukasaun Lautém submete lista estudante 433 asesu bolsa méritu ba MEJD
Nia esplika kronolojia, katak vídiu ne’e gravadu iha loron 28 maiu maibé espalla iha loron 08 juñu, ne’ebé hatudu iha estudante 13º ano hamutuk 17. Estudante sira-ne’e tuir aula normál hela.
Liga ho kestaun ne’e, Sekretáriu Estadu Sekundáriu Jerál no Ensinu Tékniku Vokasionál, Domingos Lemos Lopes, ne’ebé akompaña mós situasaun nota katak Diretór Eskola halo ona xamada ba estudante nia inan-aman sira.
“Tanba ne’e mak daudaun ne’e sira iha faze negosiasaun ho inan-aman sira oinsá mak sira bele rezolve problema ne’e iha tempu badak. Tanba ida-ne’e individuu husi estudante sira-nia asaun, tanba ne’e mak ami orienta ona ba Diretór munisípiu Lautém no Superintendente sira buka meiu oinsá para tenta rezolve problema ida-ne’e,” Sekretáriu Estadu relata.
Tuir informasaun katak estudante 11 mak tama fali ona eskola, enkuantu neen seluk, parte eskola tenta komunika maibé to’o agora la tama eskola.
Jornalista : Osória Marques
Editora : Julia Chatarina
