iklan

HEADLINE, SEGURANSA

Fulan lima: Servisu Migrasaun kontribui reseita rihun $852

Fulan lima: Servisu Migrasaun kontribui reseita rihun $852

Diretora-Jerál Servisu Migrasaun, Inspetór Xefe Polísia Adelaide da Rosa. Foto/MI

DILI, 12 juñu 2024 (TATOLI) – Diretora Servisu Migrasaun (SM), Inspetora Inspetora Adelaide da Rosa, subliña Servisu Migrasaun kolleita reseita, hahú janeiru-maiu, hamutuk rihun $852-resin.

“Reseita Estadu ne’ebé Servisu Migrasaun kolleita hosi 1 janeiru to’o 31 maiu 2024, liuhosi emisaun vistu, estensaun vistu no aplika koima hamutuk rihun $852, 20”, Adelaide da Rosa hateten ba jornalista sria iha nia kna’ar fatin Servisu Migrasaun, Vila Verde, kuarta ne’e.

Nia dehan, aplikasaun koima ne’e barak liu ba sidadaun estrajeiru sira ne’ebé tama mai iha territóriu nasionál ho vistu turista, maibé bainhira sira mai tiha halo fali atividade negósiu.

“Ita-nia lei la bandu sidadaun estranjeiru halo movimentu mai iha territóriu Timor-Leste  bainhira sira tama mai to’o iha ne’e, sira utiliza vistu turista hodi halao atividade profisionál. Agora ita halao kooperasaun ho komandante munisípiu sira hotu kuandu haree sidadaun estrajeiru mak hanesan ne’e ita kaptura no informa mai Servisu Migrasaun, ita emediata ba sira nia fatin hodi transporta sira mai hodi loke investigasau ba sira”, nia adianta.

Nia informa, Servisu Migrasaun halo prosesu ba ema estranjeiru hamutuk 230 tanba komete violasaun vistu.

“Sira ne’e mai ho viza turista, maibé kuandu to’o Timor-Leste sira halo fali atividade negósiu iha Dili inklui iha munisípiu sira. Entaun tuir ita-nia lei migasaun azíliu ita halo prosesu dilijénsia simples no fulan lima nia laran ita konsege haruka ema 46 ba fali sira-nia nasaun orijen tanba ema sira ne’e halo violasaun ba vistu”, nia relata.

Tuir Adelaide katak sidadaun estranjeiru ne’ebé sempre halo violasaun vistu barak liu ne’e sidadaun sira hosi nasaun viziñu Indonézia, tanba sira mai ho viza turista, ikus mai halo atividade negósiu hanesan faan osan mean iha dalan inklui halo fali servisu sira seluk.

Nia esplika, ba sidadaun sira ne’ebé mak viola vistu tuir, lei migrasaun azíliu iha artigu 144 sei hetan multa mínimu $200 no másimu $1000.

Empreza balun mak hakarak kontrata traballadór hosi nasaun viziñu Indonézia hodi mai servisu iha sira-nia projetu mak traballadór ne’e nia viza mate no seidauk renova, mak polísia deteta empreza ne’e iha obrigasaun tenke selu multa mínimu $670 másimu bele to’o $1050.

“Ami aplika multa tuir lei migrasaun azíliu no sei deporta sira ba sira nia rai, tanba ne’e husu ba ita-nia sidadaun sira tenke koopera, sé uza sala vistu favór informa mai Servisu Migrasaun”, Inspetora hateten.

Nia dehan, Servisu Migrasaun bainhira atu halo deportasaun ba sidadaun estranjeiru ne’ebé mak viola vistu Servisu Migrasaun mak halo dilijénsia ba nia hodi haruka nia multa no Servisu Migrasaun sei entrega ba nia Embaixada ne’ebé mak iha Timor-Leste depois sira mak lori fila sira-nia sidadaun ne’e.

Nia hateten, Servisu Migrasaun mós rejista sidadaun sira tama mai territóriu nasionál hamutuk ema 1.101 no sidadaun sira ne’ebé sai hosi territóriu nasionál hamutuk ema 1.101.

Jornalista: Natalino Costa 

Editór : Zezito Silva

 

iklan
iklan

Leave a Reply

iklan
error: Content is protected !!