iklan

EKONOMIA, HEADLINE

Nova Zelandia kompromete apoia ekonomia TL iha futuru

Nova Zelandia kompromete apoia ekonomia TL iha futuru

Vise Primeiru-Ministru no Ministru Negósius Estranjeirus Nova Zelandia, Rt Hon Winston Peters

DILI, 12 juñu 2024 (TATOLI) – Vise Primeiru Minsitru no Ministru Negósiu Estranjeiru no Kooperasaun Nova Zelandia kompromete atu apoia ekonomia Timor-Leste nian iha futuru.

“Ami iha kompromisu atu suporta Timor-Leste liuhosi área ekonomia nian, apoiu ba rendimentu rurál, edukasaun no turizmu”, Winston Peters informa ba jornalista sira hafoin hasoru malu ho Vise Primeiru Ministru no Ministru Koordenadór asuntu Ekonómiku no Ministru Turizmu Ambiente Francisco Kalbuadi Lay iha edifísiu Farol, ohin.

Nia agradese ba Governu Timor-Leste tanba bele adere ona ba Organizasaun Mundiál Komérsiu (OMK) atu bele promove ekonomia ne’ebé mak iha.

“Ami mós agradese ba Governu Timor-Leste ne’ebé adere ba Organizasaun Mundiál Komérsiu inklui ASEAN atu bele promove ekonomia sira ne’ebé mak iha”, nia afirma.

Nia esplika, Governu Nova Zelandia no Governu Timor-Leste, iha enkontru ne’e, fahe hanoin hamutuk kona-ba dezenvolvimentu Timor-Leste nian iha futuru.

“Ami-nia enkontru ne’e fahe hanoin hamutuk kona-ba dezenvolvimentu Timor-Leste nian iha futuru no hanesan belun di’ak ne’ebé dezde uluk, entaun nafatin mantein servisu sira ne’ebé mak nasaun rua ne’e atu halo ba oin”, nia haktuir.

Iha fatin hanesan,Vise Primeiru Ministru no Ministru Koordenadór asuntu Ekonómiku no Ministru Turizmu no Ambiente, Fransisco Kalbuadi Lay, hateten ohin hetan vizita hosi Vise Primeiru Misitru Nova Zelandia hodi ko’alia kona-ba área ekonomia nian ba futuru.

“Ami enkontru ne’e ko’alia kona-ba ekonomia, tanba durante ne’e Nova Zelandia fó nia kontribuisaun makas ba ita, liuliu iha área edukasaun, kapasita rekursu uamanu no mós área sira seluk ne’ebé mak iha”, Kalbuadi konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!