Governu prepara ona estratejia nasionál komérsiu eletróniku iha TL
DILI, 13 juñu 2024 (TATOLI) – Ministériu Koordenadór asuntu Ekonómiku no Ministériu Komérsiu no Indústria hamutuk ho parseiru dezenvolvimentu sira prepara ona estratejia nasionál komérsiu eletróniku iha Timor-Leste (TL), ho objetivu atu entegra iha ekonomia dijitál no global hodi hasa’e kompetividade no hadia sidadaun sira-nia moris.
“Komérsiu eletróniku reprezenta oportunidade fundamentál atu ita entegra iha ekonomia dijitál no globál, nune’e ita bele hasa’e ita-nia kompetividade no hadia ita-nia sidadaun nia moris”, Vise Primeiru Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, informa iha semináriu nasionál komérsiu eletróniku (e-comerce) no implementasaun Dekretu Lei númeru 89/2023 dezembru ho tema “optimiza rekursu hodi alkansa polítika komérsiu Timor-Leste nian ba mundu”, iha Timor Plaza Maubara Room, ohin.
Nia dehan, komérsiu eletróniku iha poténsia revolusaun ida atu hafasil setór privadu sira, hodi atinje merkadu globál sira no hamenus kustu tranzasaun hodi hadia efisiénsia liuhosi teknolojia ida-ne’e.
Iha fatin hanesan, Ministru Komérsiu no Indústria, Filipus Nino Pereira, afirma ohin hamutuk iha ne’e oinsá atu bele implementa no asegura atividade komérsiu eletróniku liuhosi pagamentu online atu trasnforma dijitál ekonomia bele la’o ona iha TL.
“Ohin ita hamutuk ho ita-nia parseiru sira hanesan Banku Sentrál Timor-Leste, Loja nain sira, super-merkadu sira no mós banku sira seluk, oinsá ita bele implementa no asegura atividade komérsiu eletróniku liuhosi pagamentu online, nune’e transformasaun dijitál ekonomia bele la’o ona iha ita-nia rain”, Nino Pereira relata.
Nia esplika, Governu halo semináriu ida-ne’e, tanba hetan ona aprovasaun hosi Konsellu Ministru ba dekretu lei rejime espesiál kona ba e-comerse no mós asinatura eletrónika sira ne’ebé mak iha.
“Ita halo ida-ne’e tanba Konsellu Ministru halo aprovasaun ba dekretu lei rejime espesiál kona ba e-comerse no mós asinatura eletrónika, entaun semináriu ne’e ita fahe informasaun, ita bele halo sosializasaun ba públiku liuliu ba setór privadu no mós loja na’in no supermerkadu sira atu haree ona prátika kona ba e-comerse liuhosi pagamentu online”, nia haktuir.
Nia relata, plataforma ida-ne’e halo atu bele fasilita atividade komérsiu hodi bele seguru no fasil no lais no mós hamenus kustu, tanba ne’e mak presiza dezenvolve konsesializasaun hosi parte hothotu atu nune’e atividade sosa no faan bele la’o ho di’ak.
Iha fatin hanesan, Vise Prezidente Kamara Komérsiu Indústria Timor-Leste (CCI-TL), Sidonio Freitas, hateten sistema eletronika ida-ne’e fasilita tranzasaun fasil no mós pagamentu lalais liu ba konsumidór sira ne’ebé mak iha Timor-Leste.
“Ita tenke buka dalan oinsá atu asiste konsumidór hothotu atu utiliza instrumentu ne’ebé mak iha atu nune’e sira hatene bele uza pagamentu eletróniku, tanba ida-ne’e fasil ba joven sira, maibé maioria ba ita-nia inan aman sira ne’ebé mak iha foho, ita tenke hanorin sira atu utiliza, tanba sira mak faan produtu barak liu”, Sidonio Freitas dehan.
Nia afirma, bainhira implementa ona sistema ida-ne’e mak fasilita liután emprezáriu sira, maioria halo pagamentu ba sira-nia trabalhadór sira, la presiza ona ba forma iha banku, maibé buat hotu liu hosi sistema ida-ne’e.
Jornalista : Felicidade Ximenes
Editór : Zezito Silva
