ESJ Laisorulai menus profesór
BAUCAU, 14 juñu 2024 (TATOLI) – Eskola Sekundária Jerál Paralelu (ESJ) suku Laisorulai, postu administrativu Quelicai, munísipiu Baucau, sei menus profesór.
Koordenadór ESG Paralelu Laisorulai, Ernesto Roumaldo Belo, esplika, situasaun referida hasoru bainhira Governu deside la kotinua profesór kontratadu sira iha dezembru tinan-2023.
“Agora daudaun ami na’in-tolu de’it hanorin estudante sira,” Koordenadór ESG Paralelu Laisorulai hateten, sesta ne’e.
Inisiu tinan-ne’e, prosesu aprendizajen iha eskola referida la másimu, tanba menus profesór ne’ebé hanorin matéria espesífiku sira hanesan Físika, Kímika, Matemátika, Ingles, Temas Literatura, Desportu, Relijiaun no Sidadania Dezenvolvimentu Sosiál.
Enkuantu Profesór ne’ebé atuál hanorin ba estudante sira mak matéria tolu hanesan Ekonomia, Portugues no Biolojia.
“Sei fó impaktu ba estudante sira iha ezame segundu períodu no exame nasionál, tanba laiha preparasaun ba matéria sira-ne’e,” Ernesto Belo akresenta.
Dirijente ESG Paralelu Laisorulai husu Governu liuhisi Ministériu Edukasaun no Serbisu Munisipál Edukasaun Baucau atu solusiona problema referida.
ESG sala paralelu Laisorulai iha totál estudante 125 kompostu husi primeiru no terseiru-anu iha área Siénsia Umanidade Sosiál no Siénsia Teknolojia.
Jornalista : Natalino Belo
Editór : Evaristo Soares Martins
