iklan

EKONOMIA, HEADLINE

Governu halo abertura ba feira turizmu marítimu hodi selebra Loron Mundiál Oceanu

Governu halo abertura ba feira turizmu marítimu hodi selebra Loron Mundiál Oceanu

Ministru Agrikultura, Pekuária, Peskas no Floresta, Marcos da Cruz, iha abertura Feira Turizmu Marítimu hodi komemora Loron mundiál oseanu iha Timor Plaza, sesta (14 juñu 2024). Imajen Tatoli/Antonio Daciparu

DILI, 14 juñu 2024 (TATOLI) – Ministériu Agrikultura Peska, Pekuaria no Floresta (MAPPF) halo abertura ba feira turizmu marítimu hodi selebra loron mundiál oceanu ho objetivu atu promove ekonomia Azul iha Timor-Leste.

“Ohin ita halo abertura ba feira ida-ne’e hodi selebra loron mundiál oceanu, entaun ita hotu hatene katak ita-nia tasi mak ita-nia moris, tanba ita ko’alia kona-ba ai-han ne’ebé prodús hosi tasi, laos ai-han ne’ebé prodús hosi rai maran, entaun ita mós promove ita-nia ekonomia azul sira liuliu biodiversidade ne’ebé ita iha hanesan ahu-ruin, baleia, ikan no sira seluk tan”, Ministériu Agrikultura Peska, Pekuaria no Floresta (MAPPF), Marcos da Cruz informa iha Timor Plaza, ohin.

Nia dehan, Governu nafatin tau importánsia ba tasi, tanba tasi mak objetu ida ba turista sira ne’ebé mak mai vizita. Tanba ne’e husu ba ema hotu atu kuidadu tasi ho di’ak.

“Eventu ida-ne’e importante ba ita atu komemora loron mundiál oceanu, nune’e ba oin tau importánsia nafatin katak ita-nia tasi mak ita-nia moris, entaun ita hotu tenke kuidadu”, nia esplika.

Nia afirma, komemorasaun loron mundiál oceanu ida-ne’e bolu atensaun ba ema hotu katak tenke proteje tasi ho di’ak.

“Lori Governu nia naran, ha’u apela ba ita hotu, tau konsiénsia katak tasi ne’e fatin ba ita atu hetan reseita ekonomia no ai-han hosi ne’eba, tanba ne’e ita hotu tenke proteje ho di’ak, nune’e husu atu servisu hamutuk hodi kuidadu biodiversidade labele mohu no mate”, nia relata.

Iha fatin hanesan, Diretór Jerál Turizmu, Antonio da Silva, dehan Ministériu Turzimu no Ambiente hamutuk ho Ministériu Agrikultura Peska, Pekuaria no Floresta (MAPPF) realiza feira turizmu marítimu hodi selebra loron mundiál oceanu atu promove ekonomia Azul iha Timor-Leste.

“Feira turizmu marítimu ida-ne’e hodi selebra ba loron mundiál oceanu, entaun feira ne’e ita halo kolaborasaun ho membru Governu sira oinsá haree ba konservasaun tasi nian, entaun ohin ne’e ita atu promove ekonomia azul, tanba atividade turizmu ne’e relasaun ho oceanu nian ba futuru ho valór boot liu ba ita-nia nasaun”, Antonio da Silva esplika.

Partisipa iha feira ida-ne’e mai hosi Compass diving, Underwater Cinema, Dreamers dive academy, Lauhata Beach Escape, Sentru Estudu Mangrove hera, Caltech Environment Timor Leste, Plastics Upcycling Alliance, Gabinete Fronteira Terrestre Marítima, Asosiasaun  Homestay Atauro, Beachside Hotel, Dive Timor lorosae, Al Eka Fish World no Universidade Nasionál Timor Lorosa’e (UNTL).

Jornalista : Felicidade Ximenes

Editór : Zezito Silva

 

iklan
iklan

Leave a Reply

iklan
error: Content is protected !!