iklan

EKONOMIA, BAUCAU, HEADLINE, MUNISÍPIU

CAT fahe informasaun kona-ba disputa traballadór iha Baucau

CAT fahe informasaun kona-ba disputa traballadór iha Baucau

Konsellu Arbitrajen Traballu (CET, sigla portugés) fahe informasaun kona-bá lei traballu iha salaun SEFOPE, Vila Nova, kinta (20/06). Imajen TATOLI/Natalino Belo.

BAUCAU, 20 maiu 2024 (TATOLI) – Konsellu Arbitrajen (CET, sigla portugés) kinta ne’e, fahe informasaun ba emprezáriu sira kona-ba disputa traballadór iha munisípiu Baucau.

Prezidente CAT, Geraldo Moniz esplika, atividade referida nu’udar parte atu halo audiénsia, investigasaun no analiza problema entre traballadór ho na’in ba kompañia sira inklui rona kronolojia ba disputa sira husi relasaun serbisu hanesan kondisaun faktu kona-ba irregularidade ne’ebé akontese bazea ba Lei Traballu artigu 101 alínea 4.

“Ami esplika kona-ba prosedimentu bainhira disputa laborál, rezolve iha konsellu mediasaun nasionál la hetan solusaun bele hato’o ba CAT atu rejistu no halo audiénsia ba disputa serbisu ne’ebé la hetan solusaun,” Prezidente CAT hateten iha Vila Nova, kinta ne’e.

CAT hanesan instituisaun indepedente ne’ebé kria husi Sekretáriu Estadu no Formasaun Profesionál (SEFOPE) bazeia ba kódigu laborál Timor-Leste tuir lei númeru 4/2012, 21 fevereiru.

CAT iha kompeténsia atu rezolve kazu disputa sira hanesan halo audiénsia no sentensa antes submete ba Tribunál bazeia ba lei laborál artigu 101 aliña 4 hateten atu atende kazu disputa laborál entre traballadór no empregadór bainhira laiha solusaun.

Bainhira Tribunál foti desizaun omologasaun tuir faktu no dadus ne’ebé aprezenta husi CAT, empregadór iha obrigasaun atu ezekuta desizaun hanesan, traballadór iha direitu atu hetan kompensasaun tuir lei traballu artigu 55-56 kona-ba indemnizasaun no kompensasaun husi empregadór.

“Diseminasaun ne’e importante, tanba ita-nia maluk barak seidauk hatene bainhira hetan disputa laborál, kuandu para ona servisu sira-nia direitu mak atu hetan kompensasaun servisu liu ona tinan-lima,” Geraldo Moniz akresenta.

Gerlado Moniz, konsidera maioria traballadór sira iha Timor seidauk hatene kona-ba lei traballu, nune’e liuhusi diseminasaun informasaun bele aumenta koñesimentu traballadór sira bainhira mosu kazu iha fatin serbisu tuir artigu 97 lei traballu.

Nia husu traballadór sira iha territóriu nasionál atu hato’o keixa, bainhira iha problema ho empregadór iha servisu fatin tanba iha direitu ba prosedimentu fasilita mediasaun no konsultasaun iha Konsellu Arbitrajen Traballu.

Direrór Kompañia Costa Motor, Estanislao Maria Quintas da Costa konsidera, diseminasaun ne’e importante, tanba bele fanu nafatin empregadór no traballador sira atu labele kumpri nafatin lei traballu ne’ebé vigora iha Timor-Leste.

“Lei iha ona atu atu fó hanoin, atu haree nafatin lei traballu ne’ebé vigora hela iha ita-nia rai nune’e labele iha dezintendimentu,” Estanislao da Costa hateten.

Estanislao konsidera empregadór no traballador nu’udar parseiru importante tanba ne’e tenke iha relasaun serbisu di’ak lao tuir regra tanba sei fó benefísiu ba parte rua.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!