iklan

EKONOMIA, HEADLINE

Xefe Estadu propoin altera Lei Saláriu Mínimu hodi hasa’e ba $150

Xefe Estadu propoin altera Lei Saláriu Mínimu hodi hasa’e ba $150

Prezidente Repúblika, Jose Ramos-Horta Enkontro ho Primeiru-Ministru, Kay Rala Xanana Gusmão.Iha Palásiu Prezidensiál, Bairru-Pité, kinta (20/06). Imajen Tatoli/Egas Cristóvão

DILI, 20 juñu 2024 (TATOLI)– Prezidente Repúblika, José Ramos Horta, propoin ba Governu atu halo alterasaun ba lei saláriu mínimu ba traballadór hodi hasa’e ba $150 ka bele liu bainhira haree ba kondisaun moris ema nian,  tanba saláriu mínimu $115 la kondís ona ba situasaun moris ema nian no folin sasán iha merkadu.

“Saláriu Mínimu $115 ne’e ki’ik demais, maibé ita haree tinan 10 liu ona, ema barak moris ho saláriu mínimu ne’e, mas labele sustenta sira nia moris, liuliu profesór sira, seguransa sivíl no traballadór seluk tan, ha’u nia hanoin bele hasa’e to’o $150 hanesan ne’e, maibé Governu tenke haree di’ak paralelu oinsá fó insentivu ba empreza sira,” Xefe Estadu afirma ba jornalista sira iha Palásiu Prezidensiál Dili, kinta ne’e.

Xefe Estadu hato’o asuntu ne’e ho nesidade kada família ne’ebé aumenta no folin sasán ne’ebé sa’e maka’as iha merkadu. Nune’e fó impaktu tebes ba traballadór barak mak servisu durante tinan 10 liu ona maibé kontinua simu saláriu $115.

“Ha’u iha prova, semana kotuk ha’u tula seguransa sivíl ida ami la’o, ha’u husu ba nia, ita nia saláriu hira, nia hatan $115, no ha’u husu serbisu tinan hira ona, nia dehan besik ona tinan 10, ha’u hakfodak, ita tenke iha polítika halo avaliasaun ba ema nia servisu, nune’e kada tinan halo mudansa, se la’e labele,” PR Horta fó hanoin.

Maske atu hasa’e saláriu mínimu ba traballadór sira mak ekonomista sira iha Governu, Banku Sentrál Timor-Leste (BCTL-sigla portugés) no Banku Nasionál Komérsiu Timor-Leste (BNCTL-sigla portugés) tenke halo estudu ne’ebé kle’an bainhira aumenta saláriu mínimu labele fó impaktu ba ekonomia nasaun no empreza sira.

“La signifika ha’u atu la konkorda aumenta saláriu mínimu, maibé ekonomista iha Governu BCTL, BNCTL tenke halo estudu ida kle’an, Governu iha obrigasaun fó insentivu ba empreza sira, nune’e kompañia sira bele moris, sira bele aguenta, se ita karega maka’as iha saláriu mínimu bele mós bele hamosu mós dezempregu iha rai-laran, nune’e mak tenke estudu didi’ak lai,” Xefe Estadu ne’e tenik.

Bainhira Governu fó insentivu ba empreza sira bazeia ba proporsaun ba númeru traballadór sira ne’ebé empreza sira fó serbisu. Maibé Governu tenke haree ho kriatividade no matenek.

Nune’e, Xefe Estadu husu  ba Governu atu halo lalais alterasaun ba lei saláriu mínimu ba traballadór hodi aumenta sira nia saláriu.

“Tenke atualiza saláriu mínimu iha Timor-Leste, ne’e inklui mós ba sira ne’ebé serbisu iha funsaun públiku ne’ebé nivél ki’ik liu. Ba sira ne’ebé manán osan boot ona lalika atualiza, maibé atualiza ba sira ne’ebé kada fulan simu $500 mai kraik,” nia relata.

Prezidente Repúblika ne’e hatutan tan, ema barak kada loron haan dala rua, maibé la hatene atu haan saida no situasaun sira ne’e kauza mós husi salariu mínimu ne’ebé la sufisiente.

Notisia relevante:Governu koordena ho CCI-TL-KSTL halo estudu kle’an molok hasa’e saláriu mínimu

Jornalista: Hortencio Sanchez

Editór: Florencio Miranda Ximene

iklan
iklan

Leave a Reply

iklan
error: Content is protected !!