Bombeiru Baucau kapasita membru liuhusi simulasaun
BAUCAU, 25 juñu 2024 (TATOLI) – Autoridade Protesaun Sivíl (APC, sigla portugés) liuhusi korpu Bombeiru munisípiu Baucau kapasita membru hodi kombate dezastre naturál liuhusi simulasaun ne’ebé hala’o iha suku Buruma.
Komadante Korpu Bombeiru Baucau, Vitorino Duarte Ribeiro, konsidera atividade referida importante tanba, liuhusi simulasaun hasa’e koñesementu membru sira hodi prevene dezastre kombate naturál hanesan kombate inséndiu no atua vítima sira husi fatin akontesimentu.
“Importante tebes ba Bombeiru Baucau tanba bainhira iha situasaun emerjénsia ruma, Korpu Bombeiru prontu ona halo atendimentu ba situasaun sira-ne’e hanesan buska no salva vítima sira iha terrenu,” Komandante Bombeiru Baucau hateten iha Buruma, tersa ne’e.
Atividade ne’ebé realiza durante loron-rua hanesan loron dahuluk membru sira aprende matéria operasaun iha terrenu no loron daruak halo prátika hanesan simulasaun inséndiu inklui halo instalasaun ba arikas hodi utiliza no hasoru situasaun emerjénsia sira iha terrenu.
Vitorino Ribeirro, konsidera liuhusi simulasaun referida parte husi atu eleva koñesimentu membru sira-nian hodi atua inséndiu tuir rekursu materiál ne’ebé iha Bombeiru Baucau.
Vitorino Ribeiro rekoñese ekipamentu iha Bombeiru Baucau sei mínimu, maibé la hamate espíritu membru sira hodi serbí no atende ba vítima sira, bainhira mosu akontesimentu dezastre naturál.
“Sira iha inisiativa atu aprende matéria ne’ebé iha hodi koko sira-nia mentalidade oinsá tún iha rai naruk no halo evakuasaun ba vítima sira,” Vitorino akresenta.
Korpu Bombeiru munisípiu Baucau rejista membru hamutuk na’in-26 ne’ebé hala’o kna’ar iha Autoridade Protesaun Sivil.
Jornalista : Natalino Belo
Editór : Evaristo Soares Martins
