BAUCAU, 25 juñu 2024 (TATOLI) – Prosesu implementasaun programa merenda eskolár iha munisípiu Baucau seidauk la’o-tuir matadalan.
Koordenadór Eskola Báziku Filiál (EBF) primeiru no segundu siklu Caibada Makasae, Gil Caetano Freitas, lamemta ho menu hahan ne’ebé estudante sira hetan durante implementasaun programa merenda eskolár tanba realidade kada semana estudante sira sei komsumu de’it na’an karau loron rua la tuir menu matadalan ne’ebé hateten loron-tolu iha semana ida.
“Sira implementa la hanesan momentu sira ko’alia nee. Agora haan na’an semana ida dala rua fali, manu tolun mak dala tolu fali, entaun ida-ne’ebé mak loos,” Koordenadór EBF Caibada Makasae hateten iha Caibada, tersa ne’e.
Tuir livru matadalan programa merenda eskolár kada semana fahe oráriu hanesan hosi loron-segunda, estudante sira sei haan etu, modo, na’an bifi, mostarda no hudi-tasak, tersa etu, manu tolun, ai-farina tahan no ai-dila tasak.
Loron-kuarta estudante sei haan etu, modo koto-mean, na’an karau no xalada frutas, kinta haan etu no na’an, modo raba raba no es-buah, enkuantu iha loron-sesta menu etu tempe tahu, fore sikoti no xalada frutas.
“Ne’e ita viola estudante sira-nia direitu, tanba iha husi nasionál hatete semana-ida haan na’an dala tolu, maibé sira implementa la halo tuir,” Gil Freitas akresenta.
Programa referida implementa husi totál grupu EJP-merenda eskolár hamutuk 35, ho establesementu dapur hamutuk 181 ne’ebé monitoriza husi Serbisu Munisipál Edukasaun Baucau no dirijente kada eskola inklui superviziona husi inspetór eskola.
EBF Caibada Makasae rejista estudante hamutuk hamutuk 226 ne’ebé sai benefisiáriu ba programa merenda eskolár tinan-2024.
Totál benefisiáriu ba programa merenda eskolár iha munsípiu Baucau hamutuk estudante rihun 20-resin kompostu husi pre-eskolár hamutuk 41 no ensinu báziku hamutuk 253.
Jornalista : Natalino Belo
Editór : Evaristo Soares Martins
