DILI, 27 juñu 2024 (TATOLI)—Komisaun C ne’ebé trata asuntu Finansa Públika iha Parlamentu Nasionál (PN), kinta ne’e, halo fiskalizasaun ba Institutu Nasionál Seguransa Sosiál (INSS).
Prezidente Komisaun C, Cedelísia Faria dos Santos, hateten, objetivu husi atividade ne’e atu konfirma ezekusaun tanba atu tama ona ba fulan-juñu, ne’ebé ezekusaun Orsamentu Jerál Estadu (OJE) 2024 tama ona ba trimestre daruak.
“Ita mai halo fiskalizasaun tanba tuir portál transparánsia, INSS nia ezekusaun to’o agora ne’e mamuk (zero) maibé ohin ami mai haree no rona diretamente, identifika katak afinál sira mós uza sistema free balance maibé husi Ministériu Finansa mak la update ba sistema. INSS nia ezekusaun orsamentu 2024 atinje ona kuaze 30%,” Cedelísia Faria, hateten, iha edifísiu INSS, Caicoli.
Haree ba situasaun ne’e, maka Komisaun C sei husu Ministériu Finansa atu tau konsiderasaun tanba orsamentu husi institutu ne’e foti husi OJE, tanba ne’e stenke atualiza iha nune’e hotu-hotu bele kontrola.
Deputada Bankada Governu ne’e konsidera, fiskalizasaun ne’e parte pozitivu ida tanba husi INSS mak sira halo kapitalizasaun ba osan sira ne’ebé kontribui ona ba seguransa sosiál ba Banku Komersiál sira iha Timor-Leste.
“Ha’u hanoin kapitalizasaun ba orsamentu ne’e di’ak tanba ita mós bele hetan reseita husi ne’e,” nia akresenta.
Notísia relevante : Kontribuente kontribui ona millaun $115.9 ba Fundu Rezerva Seguransa Sosiál
Iha fatin hanesan, Prezidente INSS, Arlindo Pinto, agradese ba Komisaun C nia prezensa hodi halo fiskalizasaun ba administrasaun sentrál INSS nian tanba orsamentu ne’ebé aloka ba institutu ne’e nu’udar OJE ne’ebé ema hotu presiza hatene nia lala’ok.
Enkuantu, públiku nia preokupasaun, liu-liu membru Parlamentu Nasionál mak kona-ba orsamentu iha fundu rezerva seguransa sosiál.
“Orsamentu fundu seguransa sosiál ne’ebé durante ne’e ita kapitaliza husi merkadu monitáriu, fundu seguransa sosiál ne’ebé ita kapitaliza ona iha Banku Komersiál ne’e hamutuk millaun $195, husi orsamentu ne’e iha tinan ne’e ita sei hetan retornu millaun $5,6, ne’ebé sei aumenta filafali ba fundu seguransa sosiál ne’ebé iha,” nia tenik.
Totál orsamentu ne’ebé kontribuente sira kontribui ona ba seguransa sosiál iha tinan ne’e hamutuk millaun $254.
Jornalista : Arminda Fonseca
Editora : Julia Chatarina
