MCI husu elementu hotu munisipál atu fortifika ekonomia iha baze
DILI, 27 juñu 2024 (TATOLI) – Ministru Komérsiu Indústria Filipus Nino Pereira husu ba kargu xefia no diretór unidade servisu deskonsentratu munisípiu atu servisu hamutuk ho Prezidente Autoridade Munisipál hodi dezenvolve ekonomia iha baze, atu bele fortifika ekonomia rai-laran.
“Ministériu Komérsiu Indústria hanesan responsabilidade ba ekonomia, entaun ho ida-ne’e, ita haree ba área komérsiu, haree ba indústria oinsá mak fortifika atividade ekonomia iha baze, fortifika mós relasaun ho setór privadu sira atu dudu ita-nia ekonomia ne’e tenke la’o tuir planu estretéjiku ne’ebé mak ita trasa tiha ona, liuliu planu asaun anuál iha MCI nian”, Filipus Nino Pereira, dehan hafoin fó pose ba kargu xefia no diretór unidade servisu deskonsentratu munisípiu iha Delta Nova, ohin.
.
Nia husu ba kargu xefia sira no diretór nasionál munisípiu atu koordena servisu ho Prezidente Autoridade sira iha baze no servisu ho prefesionál hodi bele atinje objetivu ne’ebé MCI trasa ona.
“Ita ezije tebes ita boot sira-nia dedikasaun, ita boot sira-nia lealdade, ita boot sira-nia integridade, profesionalizmu maske ita boot sira mai hosi área oioin, maibé ita boot sira iha espiritu atu buka aprende, ita hothotu iha prosesu ida-ne’e, tanba atu haklean koñesimentu iha área ita boot sira, asume ba MCI, ohin loron ita aposta ba dezenvolvimentu ekonomia, tanba ho ekonomia mak ita bele atinje prosperidade ne’e ezije ba ita boot sira”, nia hateten.
Nia haktuir, Governu atuál iha polítika boot mak dezentralizasaun, tanba ne’e funsionáriu iha baze tenke iha vontade tomak hodi servisu no dezenvolve ekonomia iha rai-laran.
“Ha’u fiar ita boot sira la’o ho vontade tomak, ita buka koordena malu nafatin, tanba iha polítika boot Nonu Governu ida-ne’e kona-ba dezentralizasaun, tanba ne’e buka atu kordena hodi suporta másimu ita-nia Prezidente Autoridade sira atu ita bele iha servisu di’ak ida-ne’e”, nia afirma.
Iha fatin hanesan, Prezidente Komisaun Funsaun Públika, Agostinho Letêncio de Deus, husu ba funsionáriu sira atu komprede promesa ne’ebé iha ona katak serví Estadu, la’ós lealdade, ba grupu no ba interese.
Tanba ne’e, Komisaun Funsaun Públika kompremete atu hahú kedas hosi juramentu ida-ne’e, la’ós de’it atu mai lee de’it surat tahan ne’e maibé implementasaun ne’e mak importante.
“Ita hanesan funsionáriu públiku, ita-nia loialidade ne’e aas liu buat hotu, ita-nia disiplina ne’e aas liu, ita-nia komitmentu aas liu, tanba ne’e mak ita hahú ho juramentu antes ba asume kargu no asina termu aseitasaun katak ita boot sira sente duni no simu duni responsabilidade”, nia dehan.
Tomada pose destina ba kargu xefia, xefe departamentu, diretór sira hamutuk 13, ne’ebé mai hosi Munisípiu Baucau, Ermera, RAEOA, Ainaro no Aileu.
Diretór Nasionál Munisípiu Aileu Marcos da Costa, agradese ba MCI tanba bele fó konfiansa ida-ne’e.
”Ha’u agradese no orgullu ba konfiansa ne’ebé MCI fó liuhosi Funsaun Públika, ha’u sei servisu hamutuk ho MCI atu haree nesesidade povu nian enfrenta atu elebora planu ida di’ak hodi atinje planu Governu nian, liuliu emprendedorismu sosiál no komérsiu indústria”, Marcos da Costa subliña.
Nia kompromete katak mantein hodi elebora liután programa di’ak hodi hatan ba nesesidade komunidade nian, kooperativa iha área oioin ne’ebé komunidade sira hasoru, hanesan ortikultura, agrikultura no kooperativa industria no sei melhora di’ak liután programa ne’ebé mak Governu anteriór halo.
Jornalista : Felicidade Ximenes
Editór : Zezito Silva
