Estudante sira tenke estuda maka’as hasoru ezame período daruak
DILI, 30 juñu 2024 (TATOLI)– Ministru Edukasaun Interinu atuál Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, apela ba estudante sira iha territóriu atu preparadu tuir ezame segundu períodu.
“Nafatin estuda nune’e bele hetan valór ne’ebé di’ak tanba ita-boot sira mak sai rekursu edukadór ne’ebé di’ak no kualidade iha futuru”,” Atuál Sekretáriu Estadu Ensinu Sekundáriu Jerál no Ensinu Tékniku Vokasionál Domingos Lopes Lemos, haktuir, iha Komisaun Funsaun Públika (KFP), Obrigado Barak, Dili, domingu ne’e.
Nia hatutan, ezame ne’e pasu ida, atu haree ba estudante sira-nian dezempeñu no aproveitamentu iha períodu ida-ne’e nia-laran.
“Tanba ida-ne’e ha’u husu estudante sira hotu iha Timor-Leste presiza konsentra didi’ak. Ita espera ezame segundu períodu la’o di’ak, no lideransa foun ne’ebé ministériu edukasaun koloka ne’e bele organiza no servisu ho másimu nune’e bele susesu liután,” governante ne’e akresenta.
Aleinde ne’e, Sekretáriu Estadu mós apela, dirijente foun sira tenke kontinua nafatin serbisu ho dirijente sesante no karik iha buat ruma ladi’ak hasai no halo fali buat foun.
“La signifika dehan imi ba atu hatún ida fali, maibé imi ba serbisu kontinua saida mak antes ne’e sira halo, ida-neʼebé ladi’ak tau sees, ida-neʼebé di’ak avansa ba oin,” nia hameno.
Diretór Jerál Ensinu Sekundáriu Jerál, Deolindo da Cruz, hateten, serbisu hotu atu la’o di’ak ne’e presiza iha komunikasaun ba malu nune’e bele atinje objetivu.
“Ita-boot sira asume knaar ne’e ita bele serbisu hamutuk di’ak liután, ita presiza komunika malu atu nune’e ita bele atinje ita-nia objetivu ne’ebé mak hatuur ona iha programa IX Governu nian hodi eleva kualidade edukasaun iha ita-nia rain,” nia dehan.
Nune’e mós ba estudante sira ne’ebé atu tuir ezame segundu períodu iha fulan jullu ne’e, tenke prepara-an no estuda maka’as nune’e hetan valór ne’ebé di’ak, tanba futuru dezenvolvimentu Timor-Leste nian iha imi nia liman.
Jornalista: Osória Marques
Editór: Evaristo Soares Martins
