DILI, 30 juñu 2024 (TATOLI)– Profesór bolsa kandidatu Abel de Jesus, hosi munisípiu Aileu, pasa ho valór 72 no prontu koloka ba kualkér munisípiu ne’ebé Ministériu Edukasaun (ME) deside.
“Ha’u pasa ho valór 72. Ha’u prontu atu kolabora ho ME hodi koloka ha’u ba iha munisípiu ne’ebé tuir opsaun ha’u hili ne’e. Tanba ne’e desizaun, tanba ne’e ami prontu,” Abel de Jesus dehan ba Tatoli, iha Komisaun Funsaun Públika (KFP), Matadouro, Dili, domingu ne’e.
Rekorda katak kolokasaun la’ós sai kestaun maibé presiza kolabora hodi kontribui ba dezenvolvimentu edukasaun iha Timor-Leste.
“Ita presiza kolabora no prontu koloka tanba dezenvolvimentu edukasaun ba rai ida-ne’e presiza profesór ne’ebé sei hakiak fini edukadór ba futuru rai ida-ne’e, ne’ebé di’ak susesu,” nia dehan.
Tanba ne’e nia husu ba kandidatu profesór sira atu mai tuir teste ne’e estuda maka’as, lee didi’ak depois tenke komprende.
“Nune’e prienxe mós tuir buat-ne’ebé ita hatene no lee ona ne’e, nune’e ita hetan valór ne’ebé di’ak nune’e pasa. Ha’u sente ezame ohin ne’e la’o normál, depende ba ema idak-idak nia koñesimentu, karik nia lee, nia estuda entaun nia sei hatene no prienxe pergunta ne’ebé mak loos no hetan valór ne’ebé mak di’ak,” nia haktuir.
Antes ne’e hanorin iha Ensinu Báziku Sentrál (EBC) 3⁰ síklu iha Remexio. Nia eskolla munisípiu Dili Aileu no Maliana.
Nune’e mós profesór kandidatu, Munisípiu Aileu, Abrão Barreto, prontu koopera ba kolokasaun eskola iha munisípiu sira.
“Ha’u prontu koopera ho ME bainhira koloka ha’u ba iha-ne’ebé de’it. Tanba ami submete dokumentu ba ME ne’e iha kedas opsaun ne’ebé mak iha-ne’ebé hodi ami hili munisípiu, nune’e ha’u hili munisípiu tolu, Aileu, Dili ko Ainaro. Nune’e ha’u prontu,” nia hateten.
Nia dehan, matéria ne’ebé sai iha ezame ne’e depende ba kada ema-nia esforsu no prepara oinsá mak bele resposta ba pergunta sira.
“Husu ba kolega sira mai tuir teste karik estuda didi’ak, lee barak nune’e mai fó responde ne’ebé loos, la signifika ita atu fó responde ne’ebé loos hotu maibé pelumenus ense netik hodi liu barreira ne’ebé mak ME estabelese,” nia fó hanoin.
Kandidatu profesór Abrão ne’e kontente ho valór 61, no ne’e mak nia esforsu durante ne’e.
“Ha’u sente kontente tanba ha’u bele pasa iha teste ida. Pasa ho valór 61 la fasil ita atu liu,” nia akresenta.
Antes ne’e nia hanorin iha Ensinu Sekundáriu Jerál (ESG, sigla portugés) N⁰ 01 públiku Laulara, durante tinan lima, ho estatutu kontratadu.
Iha fatin hanesan, kandidatu profesór, hosi Ainaro, Maubisse, Abrão Mendonça, rekoñese la preparadu hodi tuir ezame nune’e hetan de’it valór 56.
“Ohin ezame ne’e di’ak, maibé problema mai ha’u ne’e mak durante ne’e ha’u ladún lee barak, ladún peskiza entaun ne’e problema mai ha’u. Ezame ida-ne’e ha’u sente ezame bainbain, problema ne’e mai husi ita, ita tenke lee barak, bele haree kualkér matéria saida de’it, importante ita tenke lee barak”, nia haktuir.
Ho valór ne’ebé la to’o, nia dehan nafatin esforsu karik sei iha oportunidade ba faze tuir mai.
Jornalista : Osória Marques
Editór: Evaristo Soares Martins
