AIFAESA inspesiona produtu osan mean no materiál konstrusaun iha Dili
DILI, 02 jullu 2024 (TATOLI) – Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, IP), halo inspesaun ba produtu osan mean no materiál konstrusaun iha Munisípiu Dili.
“Ohin ami halo inspesaun ba produtu rua hanesan osan mean no materiál konstrusaun iha Munisípiu Dili, liuliu iha área Colmera, Aitarak Laran, Bairo Pite, Entaun ho inspesaun ida-ne’e atu hatene dokumentu negósiu ne’ebé mak empreza sira halo”, Ernesto Monteiro informa ba jornalista sira iha Hudi-Laran, ohin.
Nia dehan, hosi inspesaun ne’e atu hatene mós kuantidade no kualidade osan mean ne’ebé mak sira faan ba ema sira ne’ebé mak atu sosa.
“Ita halo inspesaun ne’e atu hatene osan mean nia grama ka todan ne’e, tanba tuir informasaun ne’ebé mak iha katak hakerek iha nota ne’eba grama lima, maibé la to’o, entaun ida-ne’e papel AIFAESA nian atu haree”, nia relata.
Nia esplika, ida seluk mak halo inspesaun ba materiál kontrusaun sira, tanba informasaun ne’ebé mak espalla no hakerek iha nota dehan besi beton ninia medida 12 milimetru, maibé realidade ema lori ba uma la to’o 12.
“Ita halo inpesaun ba materiál kontrusaun sira, tanba prezudika ba ema sira ne’ebé mak sosa materiál, entaun tuir informasaun ne’ebé mak espalla no hakerek iha nota dehan besi beton ninia medida 12 milimetru, maibé realidade ema lori ba uma la to’o 12 maibé 10 milimentru, entaun ida-ne’e prezudika tebes ba sosa na’in sira. Tanba ne’e ami mai halo inspesaun no mós divulga informasaun ba sira katak besi sira ne’e ninia medida rai ketak ho ninia observasaun sira atu nune’e ita-nia públiku mai haree katak empreza sira faan tenke onestu”, nia esplika.
Nia haktuir, inspesaun nia lalaok mak ekipa sira rekolla dadus, bainhira iha buat ruma lalos tenke rejistu, loja na’in nia naran no asina depois haruka nia ba sekretariadu atu kontinua prosesu no entrega ba parte jurídiku atu notifika no prosesu tuir lei ne’ebé mak iha.
“ Ohin ita halo inspesaun ne’e iha identifikasaun, maibé ha’u labele to’o iha ne’eba, ha’u repete tan dala ida katak identifikasaun ha’u-nia funsionáriu sira hala’o hela sira-nia servisu depois oinsá sira mak relata ba parte juridiku, depois notifika sira bainhira identifika katak balun la tuir ninia deklarasaun no la tuir buat ne’ebé mak sira hato’o, entaun ida-ne’e mak ohin ita halo atividade ida ne’e”, nia konklui.
Jornalista : Felicidade Ximenes
Editór : Zezito Silva
