ESJ Filiál Dom Carlos Belo menus profesór
BAUCAU, 03 jullu 2024 (TATOLI) – Eskola Sekundária Jerál (ESJ) Filiál Dom Carlos Filipe Ximenes Belo, suku Afaçá, postu administrativu Quelicai, munisípiu Baucau, prosesu aprendizajen paradu tanba menus profesór.
Koordenadór ESJ Filiál Dom Carlos Filipe Belo, Carlos Filipe, esplika, situasaun referida hasoru tanba maioria profesór kontratadu nune’e paradu tanba Governu deside hapara kontrantu iha inísiu tinan ne’e.
“Inisiu trimestre dahuluk mestre hanorin na’in-tolu deit, maibé iha inísiu trimestre daruak nian mestre maioria la tama ona prosesu ensinu aprendizajen nune’e la la’o to’o agora,” Koordenadór ESJ Filiál Dom Carlos Belo hateten, kuarta ne’e.
Profesór-sira paradu hanorin ho razaun laiha kontratu inklui relasiona ho nesesidade ekonomia nune’e parte dirijente eskola laiha kbiit atu fó-sai desizaun kona-ba situsaun ne’e.
Nune’e prosesu aprendizajen paradu no fó impaktu ba estudante-sira liuliu désimu segundu-anu, tanba hein ezame nasionál no lokál, tanba laiha preparasaun durante tempu prosesu aprendizajen.
“Profesór la hanorin nia impaktu mak estudante sira sai vítima,” Carlos Filipe akresenta.
Diretór Serbisu Munisipál Edukasaun Baucau, Afonso dos Santos da Costa, hateten, parte Edukasaun Baucau hato’o ona preokupasaun kona-ba menus profesór ba nasionál.
“Agora prosesu rekrutmentu la’o hela, tuir mai loke ba eskola sekundária jerál-sira,” Afonso da Costa argumenta.
ESJ Filiál Dom Carlos Belo rejista totál estudante hamutuk 121, kompostu mane na’in-55 no feto na’in-66 husi désimu to’o desimu segundu-anu.
Jornalista : Natalino Belo
Editór : Evaristo Soares Martins
