ME distribui ona materiál konstrusaun ba eskola tolu
DILI, 04 Jullu 2024 (TATOLI)–Ministériu Edukasaun, liuhosi Diresaun Nasionál Edukasaun Inkluziva no Asaun Eskolár, distribui ona materiál konstrusaun ba eskola tolu ne’ebé maka afetadu hosi dezastre naturál hanesan inundasaun bee tama, anin sobu no seluk tan ne’ebé akontese iha tinan 2024.
“Ita distribui ona materiál konstrusaun ba eskola tolu hosi afetadu dezastre naturál mak hanesan EPF-Baura iha Munisípiu Liquiça nian, EBF Ulusu, iha Postu Administrativu Uatulari, Munisípiu Viqueque no EBC Baboe leten iha Postu Administrativu Atsabe, Ermera nian,” Diretór Nasionál Edukasaun Inkluzivu no Asaun Eskolár, Fernando Santos, relata ba TATOLI, iha ninia kna’ar fatin Villa-Verde, Dili, kinta ne’e.
Tuir dadus materiál konstrusaun ne’ebé maka ninia parte konsege hala’o ona distribuisaun ba eskola tolu ne’e hanesan kalen, besi, simente no seluk tan baseia ba tipu estragus ne’ebé maka akontese ona.
“Ita simu proposta emerjénsia ba eskola afetadu inundasaun hosi udan no anin iha loron hirak liubá hamutuk haat, no iha fulan-maiu ita rekolla uluk ona 18, entaun to’o daudaun ne’e hamutuk 22,” nia esplika.
Husi totál dadus ne’e, eskola afetadu dezastre naturál hamutuk 20 maka oras ne’e ekipa hosi Ministériu Edukasaun nian re-verifika hela dadus atu nune’e bele hetan apoiu materiál kontrusaun hodi hadi’a fali sira-nia edifisiu ne’ebé mak hetan estragus.
“Hosi eskola ne’e ita halo ona re-verifikasaun ba eskola 20, no rua seidauk tanba kondisaun estrada ladi’ak, maibé ita nafatin buka meiu oinsá halo re-verifikasaun nune’e bele distribui mós materiál konstrusaun,” nia dehan.
To’o oras ne’e, nia parte simu ne’e proposta 22 maihosi Eskola Bázika Sentrál (EBC-sigla portugés) Rai Foun no Eskola Bázika Filiál (EBF) iha Tebabui, Postu Administrativu Bobonaro nian, EBF Katólika 1.2.3 Afaça, Postu Administrativu Quilecai Munisípiu Baucau, EBC No 01 Viqueque Munisípiu Viqueque, EBF Sulilaran Atabae Munisípiu Bobonaro, EBF Ulusu Postu Administrativu Uatulari Munisípiu Viqueque, Eskola Bázika Maulefo Postu Administrativu Maubisse Munisípiu Ainaro.
Nune’e mós EBF Tebabui, EBF Cota Boot Munisípiu Bobonaro, Eskola Pre-Eskolár (EPE) Carmila Letefoho, EBC Baboe Leten iha Postu Administrativu Atsabe Munisípiu Ermera, EBF Nuno-Mogue, EPE Nuno-Mogue, EBF Manutu no Waibira iha Munisípiu Viqueque nian, EBF Maulefo Munisípiu Liquiça nian, Edifísiu superintendente Munisípiu Ainaro, EBF Paralelo Mausorulu, EBC Iraler Uatulari Munisípiu Viqueque, EBC Bessilau, EBF Sarlala, EBF Tabulasi, EPE Baura Postu Administrativu Liquiça no EPF Uilgira Uatulari.
Jornalista: Osória Marques
Editór : Agapito dos Santos
