iklan

EKONOMIA, DILI, HEADLINE

PR apoia nesesidade báziku no jeradór ba komunidade Fatu’u

PR apoia nesesidade báziku no jeradór ba komunidade Fatu’u

Imajen/Espesial

DILI, 04 jullu 2024 (TATOLI) – Prezididente Repúblika, José  Ramos Horta, liuhusi Assesoria Sosiedade Sivíl no Apoiua Sosiál (SSAS) ne’ebé lidera husi Asesór Quintiliano Moníz, foin lalais ne’e, distribui apoia umanitária hanesan nesesidade báziku no jeradór hamutuk ho printer no Laptop ida inklui ‘’life-Jacket’’ iha tasi ba komunidade iha Fatu’u, Aldeia Ili-Duadoru, Suku Bikeli, Atauru.

Apoiu ne’ebé ofrese ba komunidade Fatu’u tanba Prezidente Repúblika rona difikuldade oioin mak komunidade sira iha área referidu hasoru.

‘’Iha vizita dalahuluk iha ne’e (Fatu’u), ha’u lori ita bo’ot sira nia difikuldade ba hato’o iha Prezidente Repúblika, José Ramos Horta, hanesan ita hotu nia Prezidente Repúblika atu simu povu hotu-hotu nia difikuldade. Bainhira ha’u hato’o, Xefe Estadu deside hakarak mai vizita no deskansa iha ne’e. Maibé Problema iha transporte marítima, nune’e delega ha’u mai iha ne’e atu fó apoia nessesidade báziku no jeradór no laptop ba pastór sira hodi utiliza ba selebrasaun misa tuir fiar protestante nian,’’ Assesór Quitiliano hatete liuhusi nota ne’ebé Agência TATOLI asesu husi media Palásiu Palasiu Prezidensiál, kinta ne’e.

Quintiliano dehan tan, “Ha’u hato’o mós imi nia difikuldade kona-bá bee-moos no eletrisidade maibé Prezidente Repúblika sei esforsu atu hamutuk ho Governu rezolve be-moos maibé kona-bá eletrisidade, Xefe Estadu sei buka dalan atu oferese ba Fatu’u, solár Painel ba kada uma-kain”.

Tuir planu, Prezidénsia Repúblika hamutuk autoriedade Atauru sei organiza atu Prezidente Repúblka mai vizita iha Fatu’u no area izoladu sira iha Atauru hodi hatene kondisau moris husi komunidade iha area Fatu’u, Adara no Atekru inklui fatin izoladu sira ne’ebé la assesu ba estrada iha Atauro.

Nessesidade bázika ne’ebé oferese mak hanesan Fós ho totál karón  70, Mina ba tein hamutuk 70 inklui susben kaixa 7 no Jeradór ida hamutuk ho Latop no printer no jacket salva vida iha tasi ho totál 30. Mobilizasaun ba sasan hirak ne’e, tula ho rô tolu husi Portu Beloi mak ba Fatu’u.

David Soares hanesan reprezentante komunidade expressa katak orgullu ho ajudu sira ne’ebé iha husi Prezidente Repúblika.

‘’Sente orgullu ho prezensa husi Prezidénsia Repúblika liu husi assessór SSAS-PR, no ami agradese ba apoiu sira ne’ebé ohin oferese ba komunidade 241 iha Fatu’u,” David tenik.

Entretantu, Fatu’u nu’udár area izoladu ne’ebé la iha assesu ba estrada, no dézde bei-ala nia tempu la iha karreta no motorizada ruma ne’ebé tama iha Fatu’u tamba haleu ho foho no tasi, la iha assesu ba bee-moos, telekomunikasaun no eletrisidade. Úniku transporte mak Rô. Utiliza rô, ba buka moris (dezenvolve ekonomia uma-laran), assesu ba merkadu, kuru bee, tula rai-henek no atividade sira seluk.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!