Xefe suku Soba husu kompañia normaliza fatuk iha área natar
BAUCAU, 04 jullu 2024 (TATOLI) – Xefe suku Soba, postu administrativu Laga, munisípiu Baucau, husu kompañia responsável reabilitasaun estrada diresaun Laga no Baguia atu normaliza fatuk iha natar tanba fó impkatu ba atividade agrikultura.
Xefe Suku Soba, Francisca Monica de Fátima, esplika, maske prosesu reabilitasaun estrada referida iha progresu di’ak maibé presiza transporta sai materiál konstrusaun hanesan fatuk ne’ebé kompañia abandona hela iha área natar nian nune’e komunidade sira bele utiliza hodi hala’o atividade agrikultura.
“Ami preukupa tebes, tanba barrazen ne’ebé sira halo iha fali leten kanál ladún di’ak, entaun fatuk sira-ne’e ba fali komunidade sira-nia natar laran,” Xefe suku Soba hateten iha Vila Antiga, kinta ne’e.
Nia husu Obra Públika Baucau atu fó atensaun ba kompañia tanba udan iha inísiu tinan ne’e lalin materiál konstrusaun ne’ebé husik hela tama to’o komunidade nia natar kuaze besik esktare haat iha área Sau-Uataisi.
“Tenke atensaun ba kompañia ne’e, atu suru sai tiha fatuk sira iha natar laran, nune’e ita-nia komunidade bele halo fali sira-nia natar,” Francisca akresenta.
Diretór Serbisu Munisipál Obras Públika Baucau, Agostinho Ximenes, hateten, Obra Públika Baucau laiha kompeténsia nune’e husu autoridade suku liuhusi postu administrativu atu dirije karta nune’e sei relata ba nasionál hodi buka solusaun ba asuntu referida.
“Ami la monitoriza serbisu ida-ne’e, maibé ami iha obrigasaun halo karta ba nasionál atu fó solusaun, ” Agostinho Ximenes argumenta.
Projeitu reabilitasaun estrada Laga-Baguia responsabiliza hosi kompañia Norinco International Cooporation purvolta kilómetru 38 ho luan metru neen ho totál orsamentu millaun $21.7.
Jornalista : Natalino Belo
Editór : Evaristo Soares Martins
