DILI, 06 jullu 2024 (TATOLI)—Sekretária Estadu Kooperativa (SEKoop) selebra loron internasionál kooperativa hodi hala’o atividade limpeza jerál ne’ebé hahú husi loja Seara iha Avenida de Portugal, Pantai Kelapa to’o iha igreja Motael nia oin.
“Ami hamutuk ho movimentu kooperativa primaria sira-ne’ebé mak iha ne’e hodi mai selebra no halo asaun hamoos tasi ibun loja Seara Pantai Kelapa mai to’o iha jardim 12 de Novembru Motael, depois mak sei halo divertimentu uituan no fahe sertifikadu ba kooperativa ne’ebé mak selesionadu ona,” Sekretáriu Estadu Kooperativa (SEKoop), Arsénio Pereira da Silva, hateten ba jornalista sira iha Motael, sábadu ne’e.
Husi atividade limpeza ne’e, nia dehan, SEKoope oferese nú-laloir ba públiku hanesan parte ida atu enkoraja no fó motivasaun ba mikro pequena no empreza sira liuliu sira-ne’ebé mak faan ai fuan ka nuú sira-ne’e no sei fahe sertifikadu.
“Ami sei fahe serifikadu ba kooperativa hamutuk na’in-60 mesmu kooperativu iha ita-nia rain ne’e hamutuk 222, maibé sira-nia kapitál hamutuk millaun $17, entaun ho objetivu oinsá motiva sira atu rai osan no halo atividade ekonomiku no halo produsaun, atu nune’e bele hetan rendimentu no hasa’e ekonomia iha uma kain,” nia hateten.
Iha fatin hanesan, Dirijente Kooperativa Kreditu Beki Sahe, Afonso da Costa Freitas, sente orgullu bainhira Governu Konstitusionál da-sia (IX) liuhusi Sekretária Estadu Kooperativa fó rekoñesimentu ba sira.
“Ami-nia kooperativa harii iha 2016 maibé Governu fó rekoñesimentu ona, entaun ida-ne’e ha’u sente kontente tebes, tanba ami-nia kooperativa agora kapitál hosi membru sira hamutuk rihun $65-resin,” Afonso dehan.
Nia relata, iha Governu Konstituisionálda-ualu (VIII) fó apoiu tan orsamentu kapitalizasaun no empresta liuhusi federasaun no kreditu hamutuk mil $100.
Husi osan ne’e, nia dehan, sira konstrui sede kooperativa, sosa kadeira, komputadór, laptop no seluk tan.
Sir-nia membru ne’ebé ativu hela ne’e ha ema 185 ne’ebé koopera hodi fó apoiu kooperativa ne’ebé ninia sede harii iha aldeia Bahamori, suku Ostico, postu administrativu Vemasse,Munisípiu Baucau ne’e.
Iha ámbitu aniversariu ba loron Internasionál Kooperativa ba da-101 ne’e, Governu liuhusi SEKoop fó sertifikadu apresiasaun ba kooperativa sira-nia dezempeñu, dedikasaun no progresu iha tinan lima ikus nia laran 2020-2024, hodi hametin sustentabilidade kooperativa ba dezenvolvimentu ekonómiku iha Timor-Leste.
Jornalista : Felicidade Ximenes
Editór : Cancio Ximenes
