Notariadu Baucau suspende provizoriamente atendimentu pasaporte ba sidadaun
BAUCAU, 08 jullu 2024 (TATOLI) – Servisu Konservatóriu Rejistu Notariadu Munisípiu Baucau, dezde fulan-juñu liubá suspende provizoriumente pasaporte ba sidadaun sira tanba mákina imprime aviaria hela.
Diretora Notariadu Rejistu konservatóriu Munisípiu Baucau, Justina das Neves Mendonça, esplika, situasaun referida paradu fulan-ida ona, hahú husi loron 05 fulan-juñu to’o agora tanba mákina imprime avaria nune’e suspende atendimentu iha notariadu Baucau.
“Prosesu ne’e suspende hela, depois ita-nia mákina imprime to’o mai mak ita halo fali atendimentu,” Diretora Notariadu Rejistu Konservatóriu Munisípiu Baucau hateten iha Vila Nova, segunda ne’e.
Justina Mendonça husu komunidade husi área leste hanesan munisípiu Viqueque, Lautém no Baucau bainhira presiza trata passaporte urjente bele direita ba notariadu Manatuto tanba agora iha atendementu relasiona ho estabelesementu sistema balkaun úniku.
“Situasaun mak hanesan ne’e no balkaun úniku estabelese la’o hela, maluk ne’ebé hakarak asesu bele ba direita iha Manatuto,” Justina akresenta.
Serbisu Munisipál Notariadu Rejistu Konservatóriu Baucau, kontinua halo atendimentu ba komunidade sira-ne’ebé halo dokumentu seluk hanesan Billete Identidade no Sertidaun Nasimentu ne’ebé kada loron limita kada dokumentu ho tótal ema na’in-60.
Jornalista : Natalino Belo
Editór : Evaristo Soares Martins
