iklan

EKONOMIA, BAUCAU, HEADLINE, MUNISÍPIU

BNCTL hatuur fatuk dahuluk ba konstrusaun edifísiu sukursál Baucau

BNCTL hatuur fatuk dahuluk ba konstrusaun edifísiu sukursál Baucau

Prezidente Autoridade Munisípiu Baucau, Veneranda Lemos Martins, hatuur fatuk dahuluk ba konstrusaun edifísiu foun BNCTL sukursal Baucau iha Vila Nova, tersa (09/07). Imajen Agência TATOLI/Natalino Belo.

BAUCAU, 09 jullu 2024 (TATOLI) – Banku Nasionál Komérsiu Timor-Leste (BNCTL , sigla portugés) tersa ne’e, hatuur fatuk dahuluk ba konstrusaun edifísiu foun sukursál iha munisípiu Baucau.

Prezidente Komisaun Ezekutivu BNCTL, António Victor, esplika, prosesu konstrusaun ne’e halo tanba edifísiu anteriór laiha kondisaun ne’ebé sufisiente nune’e liuhusi konstrusaun edifísiu foun bele ona iha kondisaun hodi halo atendimentu ba kliente sira.

“Ami espera katak tinan-ida ka rua nia laran, munisípiu sira-ne’ebé rai loos ona ami sei konstrui hotu banku hanesan,” Prezidente Komisaun Ezekutivu BNCTL hateten iha Vila Nova.

Edifísiu foun sukursál Baucau sei mai ho dezeñu hanesan ho sukursál seluk ne’ebé antes ne’e finaliza ona iha munisípiu seluk hanesan Rejiaun Administrativa Espesiál Oecuse Ambeno (RAEOA), Bobonaro, Ermera no Ainaro ne’ebé sei instala eletrisidade.

Prezidente Autoridade Munisípiu (PAM) Baucau, Veneranda Lemos Martins, apresia ho konstrusaun edifísiu sukursál iha Baucau, tanba sei fasilita halo atendimentu ba kliente sira.

“Husu BNCTL sai banku ne’ebé boot no di’ak ba ema hotu,” Veneranda Lemos hateten.

Lemos rekomenda atu konstrusaun referida fasilita asesu ba ema ho difisiénsia inklui inan-isin-rua no fasilidade seluk hanesan haketak saneamentu ba feto no mane.

Edifísiu BNCTL sukursál Baucau ho medida 80 m² ho totál orsamentu $1,219,647.74 ne’ebé responsável husi kompañia lokál Hedge Construction Unipessoal Lda ho durasaun servisu tinan-ida.

Edifísiu referida bainhira finaliza sei mai ho uma tipu andár kompleta ho fasilidade rampa ba ema ho difisiénsia no inan isin-rua, saneamentu públiku, jardín no fatin parajen transporte.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!