Profesór ida hetan baku hosi família estudante iha EBC Baucau
BAUCAU, 10 jullu 2024 (TATOLI) – Profesór matéria inglés hetan baku husi família estudante iha resintu Eskola Báziku Sentrál (EBC, sigla portugés) suku Tirilolo, postu administrativu Baucau Vila.
Tuir informasaun, kazu baku profesór ho inisiál DFM tanba iha loron 04 fulan-jullu bainhira iha saladeaula aprendizajen matéria inglés ne’ebé kada profesór ho inisiál DFM aplika sistema hanorin husu no hatán hodi utiliza kada estudante sira basa-malu.
Tuir kronolojia, estudante inisiál ZX hetan basa husi estudante inisiál S tanba la hatene resposta pergunta ne’ebé hato’o husi manorin-na’in nune’e rezulta estudante ZX raan sai husi tilun no tafui raan.
“Estudante la fó informasaun mai eskola, maibé kalan mak adjuntu informa mai ha’u, estudante refere ho nia família ba adjuntu nia uma, katak estudante Zelivia raan rai husi fali nia tilun no tafui kabeen ho raan,” Diretór EBC Tirilolo, Amaro Ximenes Belo hateten iha Vila Antiga, kuarta ne’e.
Maske dirijente eskola koko rezolve utiliza maneira mediasaun maibé parte família husi estudante ZX direitamente ba asalta profesór iha resintu eskola iha loron 05 fulan-jullu ne’ebé autór hamutuk na’in-lima kompostu hosi inan-aman no oan mane na’in-tolu ne’ebé utiliza kapasete baku profesór nia ulun.
“Bainhira mestre DFM to’o mai, nia (estudante) maun na’in-tolu saruntu, baku helm to’o rahun, nia amá kaer besi ida, nia apá mos ba hotu tuku mestre,” Amaro konta tuir.
Parte eskola rasik halo kontaktu ba Polísia Nasionál Timor-Leste (PNTL) hodi normaliza situasaun no kontinua transporta autór sira ba prosesu investigasaun iha eskuadra Baucau Vila.
Profesór matéria inglés atual Adjuntu EBC ho inisiál DFM, hateten, nia parte lahatene kona-ba kondisaun estudante ZX raan bainhira hetan basa husi estudante seluk.
“Sira baku kapasete to’o rahun iha ha’u-nia ulun leten,” Nia hateten.
Husi atake família ZX ba profesór DFM rezulta bubu iha parte matan fukun loos, no konsege hetan ona tratamentu husi pesoál saúde sira.
Jornalista : Natalino Belo
Editór : Evaristo Soares Martins
