DILI, 11 jullu 2024 (TATOLI) – Ministériu Saúde (MS) halo validasaun ba prosesu konsulta no dezenvolve planu estratéjiku ba kuidadu sekundáriu no tersiáriu iha Timor-Leste ba 2025-2030.
“Improtante tebes atu fahe tarefa servisu ba kuidadu saúde sekundáriu no tersiáriu, ida-ne’e mak ita tenke investe makas tanba nonu Governu ho nia programa katak, oinsá mak servisu ospitalár tenke haforsa programa sira no oinsá mak hamenus transferénsia moras ba rai liur, nune’e ita bele investe kuidadu tersiáriu iha ita-nia rain”, Vise-Ministru ba Operasionalizasaun Ospitál, Flávio Brandão Mendes de Araújo, informa ba jornalista sira bainhira partisipa workoshop, ezbosu dahuluk ba Planu Estratéjiku Nasionál ba Servisu Ospitál sira 2025-2030 iha JL-VILLA, ohin.
Nia dehan, ospitál iha rekursu umanus ne’ebé sufisiente maibé nafatin investe iha kualidade atendimentu, atu bele fó tratamentu ne’ebé mak di’ak ba pasiente sira.
Iha fatin hanesan, Diretora Jerál Servisu Ospitalár, Terlinda Conceição Barros, dehan kuidadu sekundáriu no tersiáriu mak kuidadu hosi médiku espesialista sira hosi medisina interna obstretia, pediatria fase ran, fuan no urulojia. Entaun presiza investe nafatin atu bele halo atendimentu di’ak ba pasiente sira Timor-Leste.
“Iha timor tomak, kuidadu tersiáriu, ita so halo iha HNGV, agora, ita iha ospitál referál lima hanesan Maliana, Baucau, Maubesi, Suai no RAEOA maibé hosi referál durante ne’e menus rekursu umanus liuliu espesialista sira maibé ba kazu sira ne’ebé mak labele atende, sira nafatin haruka mai hotu Dili, entaun fó todan los ba HNGV, ho nune’e mak kuidadu tersiáriu, ita haruka ba rai liur, entaun ho oras ne’e, nonu Governu nia prioridade atu haree ba ida-ne’e no ita mós tenke halo buat ruma atu ita redús, ita-nia pasiente ba rai liur”. Terlinda dehan.
Tanba ne’e, nia afirma katak tempu ona Timor-Leste investe mesak ona, tanba durante ne’e pasente sira halo tratamentu iha rai liur, la fó retornu ba Governu.
“Ita durante transferénsia moras ba rai liur ne’e la fó retornu ba ita, maibé só kura de’it ita-nia pasiente atu fila mai, entaun ita tenke hanoin ona oinsá atu investe iha rai laran, nune’e ita-nia pasiente sira bele hetan atendimentu ne’ebé di’ak liután”, nia informa.
Nia esplika, Governu nafatin hasa’e kapasidade atendimentu iha ospitál referrál lima, ati nune’e halo atendimentu ne’ebé mak adekuadu ba pasiente sira.
“Ita-nia rekursu umanus, liuliu médiku espesialista sira iha ita-nia rain besik ona 100 no maioria mak halo atendimentu iha Hospitál Nasionál Guido Valadares”, nia konklui.
Jornalista : Felicidade Ximenes
Editór : Zezito Silva
