DILI, 11 jullu 2024 (TATOLI)—Diretór Servisu Edukasaun Munisípiu Ainaro, Patrício da Costa Magno, hateten projetu konstrusaun eskola foun iha munisípiu Ainaro ne’e ninia progresu atinje ona 85%.
Notísia Relevante: Progresu konstrusaun eskola foun sia iha Ainaro atinje ona 75%
“Ita-nia eskola ne’ebé konstrui foun hamutuk sia (9) maibé eskola lima mak nia progresu atinje ona 85%, tanba eskola pinta hotu ona, azuleju no plafon mós hotu ona. Ekipa tékniku husi Ministériu Edukasaun ba haree no entrega ona, atu nune’e bele utiliza,” nia dehan ba Agência Tatoli, liuhusi telefónika, kinta ne’e.
Nia hatutan, projetu konstrusaun ne’e hela eskola haat (4) mak ninia konstrusaun ne’e foin atinje 75%, tanba hela de’it nahe azuleju, taka plafon no pinta parede maibé atu dehan besik ona 85%.
Projetu konstrusaun eskola foun sia (9) ne’ebé konstrui ne’e mak hanesan pre-eskolár rua (2) no restante ne’e eskola ensinu báziku hamutuk hitu (7).
Konstrusaun ba eskola sia (9) mak hanesan Pre-Eskolár Maubisse Vila, Pre-Eskolár Carreta Fatin, Eskola Ensinu Bázika Sentrál (EBC, sigla portugés) 04 Montanha, EBC 05 de Setembro Kasa, Eskola Ensinu Báziku Filiál (EBF) Luro, EBF Pader, EBF Maulefo, Pre- Eskolár Mane Lobat, no EBF Ahimata.
Tuir matadalan, nia dehan, molok foti osan ne’e parte rua hala’o enkontru no husu atu aselera obra ne’e, nune’e bele halais konstrusaun eskola no espera iha fulan-agostu no setembru ne’e, konstrusaun sira-ne’e bele finaliza ona.
Konstrusaun eskola ne’e hahú iha janeiru 2024 ho ninia kustu ba obra konstrusaun ne’e depende ba kondisaun mak hanesan sala tolu (3) ne’e ninia kustu $80.000, enkuantu sala tolu (3) inklui ho haris fatin ne’e kustu hamutuk $100.000-resin.
Antes ne’e, Diretór Nasionál Infraestrutura Bázika iha Ministéiru Edukasaun (ME), Hélio Lopes, hateten ME prevee miliaun $3 ba konstrusaun no reabilitasaun eskola iha teritórriu hamutuk projetu 20.
“Alokasaun ida-ne’e la’ós ona ba projetu komunitáriu maibé liuhusi prosesu aprovizionamentu ne’ebe sei jere husi kontratór ka kompañia sira-neʼebé tuir konkursu públiku. Daudaun ne’e, faze verifikasaun dokumentu tékniku no fulan-marsu bele ona iha konkursu públiku ba projetu foun 20. Projetu ne’e, ita sei realiza iha tinan ida-ne’e,” nia dehan.
Notísia Relevante: Projetu konstrusaun eskola tinan-2021, falta 14 mak seidauk finaliza
Jornalista : Osória Marques
Editór : Cancio Ximenes
