DILI, 15 jullu 2024 (TATOLI)–Sekretáriu Planeamentu no Investimentu Dezenvolvimentu Integradu iha Postu Administrativu Ataúru, Vicente Sanches Soares, hateten iha tinan ne’e Governu aloka rihun $50 ba Programa Dezenvolvimentu Nasuionál (PNDS) Ataúro hodi normaliza estrada, hadi’a eskola no tanke rezervatóriu bee iha kada aldeia iha suku.
“Iha PNDS nian hala’o nafatin reabilitasaun eskola sira no halo tanke rezervatóriu, tanba iha ne’ebá rai maran hodi responde bee ba uma kain sira dook hosi bee,” Sekretáriu Planeamentu no Investimentu Dezenvolvimentu Integradu iha Autoridade Munisipál Ataúro, Vicente Sanches Soares, hateten ba jornalista sira hafoin partisipa enkontru entre Ministériu Administrasaun Estatál ho Autoridade Munisipál ho tema “Progresu Dezenvolvimentu Kapital”, iha Bebora.
Nia relata, kada suku iha projetu hamutuk rua (2) ka tolu (3) tanba iha projetu reabilitasaun no konstrusaun foun ba populasaun ne’ebé ho nia kustu ba pagamentu projetu ne’e labele liu rihun $50 iha kada suku.
Tuir nia, populasaun illa Ataúru hasoru manas makaas no povu halerik duni ba bee-moos, tanba bee-moos nu’udar elementu ida bázika ne’ebé halo komunidade halerik ba bee.
Nia esplika, Bee Timor-Leste, Empreza Públiku (BETL-EP) no autoridade munisipál haree ona halo perfurasaun no kanaliza bee matan ba populasaun hodi tau kontadór, aleinde halo konservasaun bee.
“Ita halo oinsá mak bee bele sufisiente ba ema hotu, tanba bee fura ne’e besik tasi,” nia hateten.
Sekretáriu Planeamentu no Investimentu Dezenvolvimentu Integradu ne’e hateten, Ataúro iha suku lima (5), aldeia 19 ho totál populasaun liu rihun 12.
Jornalista : Jesuína Xavier
Editór : Cancio Ximenes
