DILI, 15 jullu 2024 (TATOLI)—Governu liuhusi Ministériu Ensinu Superiór Siénsia no Kultura (MESSK) iha ona planu atu harii tan instituisaun politékniku tolu iha Timor-Leste ho objetivu atu prepara joven sira ba kampu traballu.
“Governu iha hanoin atu harii tan institutu politékniku tolu iha munisípiu Lautém, Covalima no Manatuto. Ita atu prepara ita-nia joven sira tama ba kampu traballu ne’e importante tebes tanba ita hakarak tama ba ASEAN, ita iha dezafiu kuandu ita la prepara ita-nia joven sira,” Ministru Ensinu Superiór Siénsia no Kultura, José Honório da Costa Pereira Jerónimo, informa iha ninia knaar fatin, Colmera, segunda ne’e.
Notísia relevante : IPB sei halo rejistrasaun ba estudante foun iha semana oin
Estabelesimentu instituisaun ensinu superiór públika foun sira hanesan mós kompromisu no polítika IX Governu, ne’ebé mak planeia hakarak atu harii Institutu Politéniku Otelaria no Turismu iha Lautém, Institutu Politéniku Engeñaria iha Suai no Akademia Peska no Estudu Mariña iha Manatuto.
“Governu hakarak investe iha politékniku. Ha’u fiar tinan ida-ne’e ita iha ona sistema kualifikasaun nasionál ida-ne’ebé bele sertifika ita-nia formandu sira bainhira sira bele bá li’ur bele ona entrega sertifikadu para ema bele tau sira ba serbisu fatin ne’ebé mak sira serbisu bá,” nia akresenta.
Antes ne’e, Ministru José Honório hamutuk ho tékniku sira realiza sorumutu ho Autoridade munisípiu Lautém hodi sensibiliza kona-ba planu implementasaun Institutu Politékniku Otelaria no Turizmu iha Lautém, ne’ebé mak Governu planeia ona atu harii iha tempu badak.
Despaisu Ministeriál husi Ministériu Ensinu Superiór, Siénsia no Kultura nú 14/III/MESCC/2024, fó ona kompeténsia hodi forma komisaun téknika espesífika ida hodi haree ba implementasaun estabelesimentu Ensinu Superiór Tékniku sira iha munisípiu sira hanesan Covalima, Manatuto no Lautém rasik, ne’ebé ho nia responsabilidade hodi halo koordenasaun téknika ho autoridade sira, departamentu balun iha Governu ne’ebé mak relevante no identifika rekursu nesesidade sira ne’ebé nesesáriu hanesan rekursu umanu no materiál.
Jornalista : Osória Marques
Editora : Julia Chatarina
