MKI disemina informasaun kona-ba lisensa no baze industiriál iha Baucau
BAUCAU, 16 jullu 2024 (TATOLI) – Governu liuhosi Ministériu Komérsiu no Indústria (MKI) tersa ne’e, disemina informasaun kona-ba dekretu-lei rua hanesan lisensamentu industriál no baze industriál iha Baucau.
Diseminasaun informasaun ba dekretu-lei rua hanesan dekretu-lei númeru 90/2023 kona-ba lisensamentu indústrial no dekretu-lei númeru 91/2023, kona-ba baze indústrial importante tanba atu asegura atividade komersiál no ligadu ho nesesidade komérsiu internasionál bazea ba politika dezenvolvimentu industriál hanesan turizmu, petrolíferu, pekuária, agrikultura no komérsiu industriál.
Nune’e, Ministru Komérsiu Indústria, Nino Perreira, urgullu no apresia ho prezensa partisipante sira iha diseminasaun dekretu-lei rua ne’e tanba iha sinérjia serbisu ne’ebé metin husi baze liuliu koordenasaun entre setór privadu no Governu.
“Governu hola papél reguladór, hanesan lei sira-ne’ebé iha sei favoravel ba ambiente negósiu,” Ministru Komérsiu no Indústria hateten iha Salaun Canossiana, Vila Antiga, tersa ne’e.
Nino Perreira, esplika, ho aprovasaun dekretu-lei rua referida la’ós atu hanaruk burokrasia administrasaun maibé fasilita di’ak liután atividade ekonomia liuhosi dalan legál tanba ne’e presiza atu apoia tipu negósiu hotu nune’e reforsa ekonomia iha rai-laran ne’ebé kontribui maka’as husi setór privadu sira inklui asegura prezensa investidór husi rai-li’ur.
“Negósiu kuandu la’o iha ita-nia rai bainhira prienxe rekizitu sira hanesa seguru, saudável nune’e buat sira-nee mak ita kria hodi fasilita atividade indústrial,” Nino Perreira akresenta.
Prezidente Autoridade Munisípiu Bobonaro, Veneranda Eurico Lemos Martins, hateten, IX Governu iha kompromisu atu hakarak kria no haforsa ambiente ne’ebé prósperu ba dezenvolvimentu no diversifikasan ekonómiku nune’e MKI hahú disemina dekretu-lei rua referida atu entidade iha Baucau hatene antes tama ba vigór.
“Diseminasaun dekretu-lei rua ne’e importante mai Baucau,” Veneranda Lemos hateten.
Eis deputada ne’e, argumenta, Baucau oan barak mak hola parte iha vida negósiu tanba ne’e regulamentu ne’ebé válidu iha Timor-Leste tenke fasilita emprezáriu tandu eskala kiik, médiu ba boot nune’e futuru bele atrai investidór husi rai-li’ur halo investimentu iha Baucau.
Dekretu-lei númeru 90/2023 kona-ba lisensiamentu industriál previstu hamutuk artigu 41 ne’ebé fahe ba kapítulu VI hanesan dispozisaun jerál, lisensamentu atividade setoriál indústria, kadastru indústria, medida fiskalizasaun kautelár, rejime sansaun no despozisaun tranzisaun no finál.
Enkuantu dekretu-lei númeru 91/2023, loron-27 dezembru kona-ba baze industriál hamutuk artigu 62 husi títulu VIII hanesan dispozisaun jerál, koordenasaun, promosaun dezenvolvimentu no fiskalizasaun atividade industriál, instalasaun infraestrutura, dezenvolvimentu adekuadu rekrusu, fonte finansiál, klasifikasaun empreza, sansaun no diálogu.
Diseminasaun informasaun referida partisipa husi empregadór Baucau, kargu xefia, diresaun liña ministeriál no Prezidente Autoridade Munisipál (PAM) Baucau, autoridade postu no suku sira.
Jornalista : Natalino Belo
Editór : Evaristo Soares Martins
