BOBONARO, 19 jullu 2024 (TATOLI) – Polísia Nasionál Timor-Leste (PNTL) munisípiu Bobonaro rejista, entre Janeiru no Jullu, krime hamutuk 121, ne’ebé maioria mak kazu ofensa integridade fízika simples, informa Komandante PNTL Bobonaro, Agostinho Gomes da Silva.
“Kazu sira ne’e nia nivel aas liu mak ofensa integridade fízika simples, ne’ebé kontribui husi violénsia domestika, krime ordináriu no abuzu seksuál. Aleinde ne’e, tanba jeografikamente Bobonaro iha liña fronteira maka kazu kontrabandu okupa segunda lugar. Kazu seluk iha mós ameasa ne’ebé akontese, maibé ita-nia forsa polísia sempre halo asaun”, Agostinho Gomes relata iha ámbitu diálogu ne’ebé organiza husi Asesór Prinsipál Prezidente Repúblika, Tenente-Jenerál Reformadu, Lere-Anan Timur, ho tema “Jerasaun foun maka garante nasaun nia futuru”, iha salaun Maria Tapó, ohin.
Husi totál kazu ne’ebé rejista omisídu haat, suisídiu rua, infantisidade ida ka so’e bebé iha Lale, suku Holsa, postu administrativu Maliana.
Superintedente Xefe ne’e adianta katak husi kazu hitu ne’e, liuliu omisídiu rua ne’ebé akontese iha Balibó, Leohitu no Lale, Maliana, mak to’o agora PNTL seidauk identifika supeitu.
Notísia Relevante: Janeiru-maiu, PNTL Bobonaro rejista kazu tranzasaun ilegál 61
“Kazu rua ne’e PNTL Bobonaro rejista ona ba Ministeriu Públiku no kazu sira seluk arguidu daudaun iha ona prizaun Suai”, dehan.
Aleinde ne’e, komandante ne’e mós atualiza situasaun seguransa ein jerál iha Bobonaro la’o ho hakmatek, maske iha grupu balu husi Organizasaun Arte Marsiál kontinua halo perturbasaun ba órden públika iha Maliana Villa.
Notísia Relevante: PNTL Bobonaro: Bebé ne’ebé mate iha Maliana kauza hosi ema buti kakorok
Jornalista: Sérgio da Cruz
Editora: Maria Auxiliadora
