DILI, 22 jullu 2024 (TATOLI) – Ministériu Turizmu no Ambiente (MTA) hamutuk ho South Pacific Tourism Organization (SPTO), fó formasaun ba ema 20 iha área turizmu, durante loron lima, kona-ba utilizasaun instrumentu kolesaun dadus, análize dadus no prodús dadus.
Objetivu hosi formasaun ne’e atu utiliza instrumentu sira kona-ba kolesaun dadus, análize dadus no prodús dadus iha área turizmu nian, entaun ho formasaun ne’e mak atu fó ba entidade sira hosi Banku Sentrál, NGO, Estatístika no mós Ministériu Turizmu”, Diretór Jerál Turizmu Antonio da Silva dehan ba jornalista sira, ohin, iha salaun JL Villa.
Silva rekorda, MTA nu’udar membru ba South Pacific Tourism Organization (SPTO), dezde 2012 ho ativamente hola parte ona iha atividade SPTO nian. Tanba ne’e, liu hosi Diresaun Nasionál Estatístika no Peskiza-DNEP hala’o formasaun peskiza iha área turismu, no akipa sira ne’ebé fó treinamentu ne’e mai husi SPTO Fiji.
Iha fatin hanesan, Prezidente Institutu Nasionál Estatístika Timor-Leste, Elias dos Santos Fereira, hateten formasaun ida-ne’e importante tebes iha área turizmu nian, atu uza opotunidade ho di’ak hodi aprende.
‘’Ha’u hanoin oportunidade ida-ne’e di’ak tebes, atu uza didiak, tempu hodi aprende iha formasaun ida-ne’e”, Elias esplika.
Xefe Ofisiál Ezekutivu SPTO, Christopher Cocker, dehan formasaun ne’e atu promove utilizasaun espesífiku tuir indikadór sustentavel sira liuhosi aspetu ekonómiku sosiál, kulturál no ambientál sira.
“Ami mós hakarak promove utilizasaun espesífiku ba indikadór sustentável sira katak sasukat turizmu la’ós de’it haree ba aspetu ekonómiku maibé ba sosiál, kulturál no mós ambientál sira”, Christopher konklui.
Jornalista : Felicidade Ximenes
Editór : Zezito Silva
