Suku Buruma seidauk hato’o relatóriu orsamentu UNP faze dahuluk
BAUCAU, 22 jullu 2024 (TATOLI) – Autoridade suku Buruma, postu administrativu Baucau Vila seidauk hato’o relatóriu projetu Uma Naroman ba Povu (UNP) faze daruak ba Programa Nasionál Dezenvolvimentu Suku (PNDS) munisípiu Baucau.
Diretór Serbisu Munisipál Delegasaun Territórial PNDS Baucau, Amaro Gusmão Gama Fernandes, esplika, suku Buruma finaliza ona prosesu konstrusaun UNP hamutuk uma tolu ba benefisiáriu sira maibé to’o agora seidauk simu relatóriu finál ba projetu ne’ebé hahú implementa iha tinan-2021 nian ne’e ba PNDS munsípiu.
“Projetu fíziku iha ha’u-nia liman pursentu 100, maibé relatóriu finansa nian mak ita seidauk hatene,” Diretór Serbisu Munisipál PNDS Baucau hateten iha Vila Nova, segunda ne’e.
Benefisiáriu ba projetu referida mai husi uma-kain tolu kompostu hosi faluk, oan kiak no ema ho difisiénsia husi aldeia Caeasamutu ho medida uma 48 metru² kompostu kuartu tolu, hariis-fatin inklui dapur ida.
Amaro Fernandes, argumenta, projetu faze dahuluk implementa liuhusi Ekipa Jestaun Suku (EJS) lideradu husi xefe suku ne’ebé monitoriza husi ekipa tékniku PNDS postu Baucau Vila nune’e relatóriu responsável husi EJS entrega ba postu antes submete ba tékniku kontabilidade hafoin tékniku enjeñeiru sertifika ba projetu fíziku.
“Ha’u akumula, ne’ebé ha’u sei komfirma parte postu lai, sira halo ona enkontru finál ka lae,” Amaro akresenta.
Uma Naroman ba Povu (UNP) faze dahuluk iha suku Buruma ho totál orsamentu hamutuk rihun $51-resin ne’ebé fahe ba kada benefisiáriu ho kustu orsamentu hamutuk rihun $17.
Jornalista : Natalino Belo
Editór : Evaristo Soares Martins
