MAPPF sensibiliza lei kona-ba Saúde Animál no Kuarentena ba setór privadu sira
DILI, 24 Jullu 2024 (TATOLI) – Ministériu Agrikultura, Pekuária, Peska no Floresta (MAPPF) sensibiliza lei númeru 41/2023, 31 Maiu, kona-ba Saúde Animál no Kuarentena ba setór privadu hamutuk 100-resin ligada ba atividade esportasaun no importasaun nian.
Diretór-Jerál Servisu Korporativa MAPPF, Rofino Soares Gusmão, dehan lei ne’e implementa ona, maibé seidauk iha atividade sosializasaun ba setór privadu sira tantu emprezáriu singulár komu koletiva iha Timor-Leste maka sira seidauk hatene ho didi’ak konteúdu husi lei ne’e rasik.
Tanba ne’e, MAPPF konvoka semináriu ne’e hodi divulga regulamentu kona-ba esportasaun no importasaun produtu agríkola ne’e ba setór privadu sira atu entende didi’ak, nune’e iha futuru molok sira hala’o atividade ne’e bele iha ona koñesimentu kle’an kona-ba lei ne’e rasik.
“Lei ne’e promulga ona iha tinan kotuk, maibé ita implementa de’it no la halo esplikasaun ba empreza privada no koletiva sira. Tanba ne’e, atividade importasaun no esportasaun sasán ne’e sempre mosu problema. Nune’e maka ita deside halo fali sensibilizasaun ba sira atu iha futuru bele la’o tuir lei ne’ebé vigora ona”, Rofino Gusmão hateten iha salaun enkontru MAPPF, iha Comoro, ohin.
Dirijente ne’e esplika katak konteúdu husi lei ne’e nia orientasaun regula liubá sasán sira ne’ebé fó perigu ba ema no nasaun, inklui animál sei la autoriza atu tama Timor-Leste no sai bá rai-li’ur.
Rofino Gusmão husu ba setór privadu sira ne’ebé sai parseiru ba Governu atu buka hatene lei ne’e ligada ba atividade importasaun no esportasaun no tenke kolabora no implementa tuir lei ne’ebé vigora, tanba Timor-Leste sai ona membru Organizasaun Mundiál Komérsiu (OMK).
Iha fatin hanesan, Diretór Supermerkadu Centro, Marli Yahya, dehan durante ne’e sira-nia empreza sempre hala’o atividade importasaun ai-fuan mak barak liu, hanesan ai-nanas, pateka, pitaya, tanba produsaun ai-fuan sira ne’e sei falta iha Timor-Leste.
“Bainhira tama Timór, parte Servisu Kuarentena sira halo intervensaun hodi haruka ko’a hotu ai-nanas nia ulun sira. Ami husu sira-nia esplikasaun tanba sá mak tenke ko’a hotu ai-nanas nia ulun sira, parte Kuarentena dehan ne’e lei mak regula, maibé husu lei atu fó mai ami, sira la fó”, nia lamenta.
Maske nune’e, ho divulgasaun lei husi Ministériu Agrikultura ne’e bele ajuda sira iha futuru bainhira importa sasán ruma bele komprende ona lei sira ne’ebé regula iha kada artigu.
Diretór Unidade Kuarentena no Biosseguransa, Manuel da Costa, esplika katak atividade divulgasaun lei númeru 41/2023 ne’e importante tebes, tanba durante ne’e ema barak maka seidauk hatene ho didi’ak lei ne’ebé Kuarentena implementa.
“Ita fahe informasaun ne’e ba setór privadu sira iha Timor-Leste, tanba ita mós hakarak atu prevene moras mai husi hahán importada sira, tanba moras afeta husi hahán sira ne’e ema barak la hatene. Nune’e maka liu husi lei ne’e atu regula kuandu sasán sira tama no sai husi territóriu Timór tenke liuhusi kontrolu Kuarentena nian”, dehan.
Jornalista: Tomé Amado
Editora: Maria Auxiliadora
