Asidente iha Triloka rezulta ema ida kanek
BAUCAU, 25 jullu 2024 (TATOLI) – Asidente motorizada ne’ebé envolve kareta estadu iha loron 24 jullu iha Suku Triloka, postu Baucau Vila rezulta ema na’in-ida hetan kanek.
Asidente referida akontese purvolta oras 16:00 bainhira motorista inisiál OF idade 28, diresaun husi Baucau Vila ba Bucoli kondús motorizada satria xapa-matríkula S.4167, husi diresaun Vila Nova ba suku Bukoli, maibé to’o estrada públiku suku Tiriloka, mosu asidente xoke kareta Estadu marka Ranger xapa-matríkula 07-508 G nune’e rezulta kanek tanba roos motorizada tama to’o karreta okos.
“Nia kanek iha parte kabaas no ulun, ne’ebé todan iha parte ulun,” Xefe Seksaun Tránzitu Polísia Nasionál Timor-Leste (PNTL) munisípiu Baucau, Sarjento Xefe Polísia Alberto M. Piedade Gusmão hateten iha Vila Nova, kinta ne’e.
PNTL Baucau liuhusi seksaun Tránzitu bainhira halo observasaun, nota distánsia vítima roos to’o karreta okos kuaze metru 10 nune’e rezulta kanek, tanba vítima baku ulun ba besi karreta iha parte okos.
Vítima rasik kontinua kedas transporta ba Ospitál Rejional Eduardo Ximenes (HoREX-sigla Portugés) Baucau maibé tanba kondisaun grave nune’e deside kontinua transporta ba Ospitál Nasional Guido Valadares (HNGV, sigla portugés) Dili hodi halo tratamentu.
“Komunidade ajuda lori sai, tanba karreta halai ba oin no kotuk mos ladi’ak, entaun komunidade hiit sa’e karreta mak hasai,” Sarjentu Xefe Alberto akresenta.
Kareta estadu ne’ebé vítima xoke, bainhira mosu asidente ho kondisaun paradu ho diresaun Dili, maibé PNTL Baucau sei kontinua prosesu tuir lei kódigu estrada ne’ebé vale iha Timor-Leste tanba vítima hetan kanek grave.
Enkuantu, PNTL mós kontinua prosesu kontinuasaun bainhira kondisaun rekupera, tanba vítima ho kondisaun lanu inklui la uza kapasete kondús motorizada iha estrada públiku.
Alende ne’e, PNTL seksaun tránzitu munisípiu Baucau asegura evidénsia hanesan motorizada no karreta Estadu iha edifísiu hodi hein prosesu kontinuasaun.
Jornalista : Natalino Belo
Editór : Evaristo Soares Martins
