BAUCAU, 25 jullu 2024 (TATOLI) – Inséndiu ne’ebé akontese iha aldeia Defadae, suku Makalaku, postu administrativu Quelicai, munisípiu Baucau, estraga uma tolu iha loron-kuarta, 24 jullu.
Kazu referida akontese iha loron-kuarta, 24 jullu ne’ebé kauza maihusi sunu ahi iha dapur laran bainhira te’in hahan no husik abandona nune’e fó impaktu ba didin to’o rezulta ahi alastra uluk dapur no kontinua ba uma hela inklui kontinua alastra tán uma-lisan hodi rezulta uma-tolu ne’e hetan estragus totál.
“Bainhira akontese, laiha ema ruma besik iha ne’ebá atu kontrola, sasán hotu iha uma-laran la salva,” Xefe Gabinete Jestaun Risku Dezastre Naturál Munisípiu Baucau, Basilio Amaral hateten iha Vila Nova, kinta ne’e.
Autoridade Protesaun Sivíl simu kontaktu husi dirijente APC sesante, direitamente to’o iha lokál akontesimentu hodi observa direita situasaun hanesan atuasaun dahuluk, halo verifikasaun no fó apoia emerjénsia ba vítima sira.
Vítima sira evakua ona ba uma viziñu hodi hein prosesa dokumentu iha Autoridade Administrasaun Munisipál Baucau no kontinua relata ba nasionál hodi hetan apoia materiál rekuperasaun.
Vítima sira hamutuk totál xefe família tolu kompostu iha uma-lisan ida no uma rezidénsia iha xefe família rua.
Jornalista : Natalino Belo
Editór : Evaristo Soares Martins
