DILI, 31 jullu 2024 (TATOLI) – Ministru Transporte no Komunikasaun (MTK), Miguel Marques Gonçalves Manetelu, aprezenta projetu Dekretu-Lei kona-ba alterasaun dahuluk ba Dekretu-Lei númeru 15/2012, loron 28 Marsu, relasiona regulamentu ba setór telekomunikasaun, ne’ebé hetan ona aprovasaun iha ámbitu reuniaun Konsellu Ministru ordinária, kuarta ne’e.
Reuniaun Konsellu Ministru ne’e prezide husi Primeiru-Ministru, Kay Rala Xanana Gusmão no hetan partisipasaun husi Membru Governu sira.
“Objetivu ba alterasaun proposta sira-ne’e mak atu klarifika dispozisaun sira ne’ebé eziste, hodi simplifika prosesu lisensiamentu no garante transparénsia ida ne’ebé boot-liu iha operasaun sira ne’e”, refere nota ne’ebé Ajénsia TATOLI asesu iha Portal Governu.
Diploma ne’ebé revee ona propoin mós medida sira hodi hadi’a efisiénsia iha resposta ba solisitasaun informasaun no hodi garante katak taxa no kontribuisaun sira hetan regulamentu ho adekuadu, atu nune’e hametin konkorrénsia no klareza iha merkadu telekomunikasaun nian.
Entretantu, iha dekretu-lei númeru 15/2012, loron 28 marsu, mensiona katak telekomunikasaun esensiál ba dezenvolvimentu futuru Timor-Leste, ba kriasaun empregu, prestasaun servisu iha área vitál hanesan saúde, edukasaun, justisa no orden ba funsionamentu administrasaun.
Mensiona mós katak, rekoñese importánsia merkadu telekomunikasaun kompetitivu, ba futuru sosiál no ekonómiku Timor-Leste, Governu empeña prosesu liberalizasaun merkadu telekomunikasaun no introdús efetiva konkorénsia ba merkadu ne’e, liuhusi partisipasaun setór privadu.
Nune’e, hanesan parte husi prosesu ne’e, Governu estabelese kuadru legál telekomunikasaun no kria autoridade nasionál ba telekomunikasaun, ho atribuisaun devér no kompeténsia nesesária atu esegura implementasaun.
Autoridade Nasionál Komunikasaun (ANC, sigla portugés) hanesan institutu públiku ida ho personalidade jurídika no adota autonomia administrativa no finanseira, orsamentu no patrimóniu própriu, ne’ebé ezerse funsaun hanesan entidade reguladora ba setór telekomunikasaun.
Jornalista: Hortencio Sanchez
Editór: Florencio Miranda Ximenes
