Kazu tiru iha Gariuai, PNTL Baucau dezarma membru na’in-ida
BAUCAU, 31 jullu 2024 (TATOLI) – Komandu Polísia Nasionál Timor-Leste (PNTL) munisípiu Baucau deside dezarma membru na’in-ida tanba fó pistola ba sidadaun sivíl utiliza tiru iha suku Gariuai, postu administrativu Baucau Vila.
Kazu referida akontese iha loron 13 fulan-jullu bainhira membru Polísia inisiál AF entrega arma pistola ba sidadaun sivil ho inisiál HF tanba kondisaun moras hafoin partisipa serimónia kulturál no tuir dalan husi Laculiu, postu Quelicai.
Bainhira simu tiha arma pistola, HF kontinua ba aldeia Uatuwa, suku Gariuai, postu Baucau Vila hodi halo asaun tiru sa’e ho argumenta nu’udar membru Polísia.
“Ita bolu kedas membru nee, sasán ita hasai dezarma hotu, HF ita aplika ona TIR ba nia hein prosesu normal,” Komandante PNTL Munisípiu Baucau, Superintendente Xefe Antoninho Mauluta, hateten iha Vila Nova, kuarta ne’e.
Kazu referida akontese membru PNTL AF rasik bainhira to’o uma halo esforsu buka tuir maibé lahetan no AF entrega hikas pistola iha loron 14 fulan-jullu.
Liuhusi prosesu investigasaun, Komandu Baucau liuhusi departamentu justisa fó sansaun disiplinár inklui deside dezarma membru Polísia hodi hein desizaun husi Komandu Jerál PNTL.
Enkuantu HF rasik Komandu PNTL Baucau aplika Termu Identidade Rezidénsia (TIR) no rejistu ona iha Ministeriu Publiku hodi hein prosesu kontinuasaun.
“Ita haree prosesu disiplinár inklui norma PNTL nian, ita mós iha lei arma nian ne’ebé prosesu disiplinár agora sei haree ida-ne’e,” Mauluta akresenta.
AF nu’udar membru ativu ne’ebé durante halo serbisu utiliza arma pistola ho karregadór tolu nune’e arma referida dezarma ona iha Komandu PNTL Munisipiu Baucau.
Jornalista : Natalino Belo
Editór : Evaristo Soares Martins
