Timor-Leste realiza forum negósiu iha Beijing hodi atrai investór
DILI, 31 jullu 2024 (TATOLI) – Prezidente Repúblika, José Ramos Horta, lidera fórum emprezariál ida iha Beijing-Xina, ho objetivu atu hametin relasaun ekonómiku ho Xina, nune’e bele atrai investór Xineza sira.
Eventu ne’e, organiza husi responsável prinsipál timoroan sira inklui Vise-Primeiru-Ministru no Ministru Asuntu Ekonómiku, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas no Embaixadór Timor-Leste nian iha Xina, Maubere Lorosa’e da Silva Horta.
“Forum ne’e destaka relasaun metin entre nasaun rua ne’e durante tinan 22 ho Xina nia signifikadu nu’udar poténsia globál no rejionál. Nesesidade ba Governu atu atua lalais hodi hadi’a kondisaun sira ba investimentu nian, liuliu iha dezenvolvimentu lei sira ba protesaun investimentu nian ne’ebé maka’as,” dehan Xefe Estadu liuhusi nota ne’ebé Ajência TATOLI asesu, kuarta ne’e.
Iha deklarasaun, PM Horta nota mós katak, interese investór nian interese aas, nune’e ministériu relevante sira Timor-Leste nian tenke akompaña ho asaun konkretu sira, inklui rezolve preokupasaun sira kona-ba dupla tributasaun ne’ebé levanta husi investidór potensiál sira.
Durante eventu ne’e, aprezenta oportunidade investimentu oioin iha Timor-Leste ba negósiu Xineza sira, ne’ebé kobre setór sira hanesan infraestrutura, agrikultura, no turizmu.
Lokalizasaun estratéjiku nasaun nian, forsa traballu joven, no rekursu naturál hanesan vantajen prinsipál ba investór potensiál sira.
Durante atividade ne’e, partisipante Xineza sira hatudu interese partikulár ba Timor-Leste nia planu ba diversifikasaun ekonómika no dezenvolvimentu sustentável.
Jornalista: Hortencio Sanchez
Editór: Florencio Miranda Ximenes
