UNP faze daruak iha Buruma atinje 85%
BAUCAU, 31 jullu 2024 (TATOLI) – Uma Naroman ba Povu (UNP) faze daruak iha suku Buruma, postu administrativu Baucau Vila atinje ona 85%.
Xefe Suku Buruma, Liborio dos Santos Freitas esplika, suku referida liuhusi Programa Nasionál Dezenvolvimentu Suku (PNDS) iha tinan-2023 hetan alokasaun orsamentu hodi konstrui uma-sia ba benefisiáriu hamutuk sia husi aldeia tolu ne’ebé iha prosesu finalizasaun hanesan kompleta asesória uma nian.
“Taka hotu ona, agora hein kompleta de’it asesória sira haneasan rampa no plafon sira-ne’e, ne’ebé kuaze atu remata ona,” Xefe Suku Buruma hateten iha Vila nova, kuarta ne’e.
Benefisiáriu sira maihusi aldeia tolu hanesan Ono-Sere, Suliua inklui Tasi, ne’ebé kada aldeia benefisiáriu na’in-tolu.
Benefisiáriu sira fahe uma-kain haa konstrui uma medida 54m² kompostu kaurtu 2, dapur no hariis-fatin, no na’in-lima seluk konstrui uma medida 62m² hanesan kuartu tolu, dapur no hariis-fatin.
“Bele ajuda ona ita-nia família vulnerável sira hetan uma di’ak, espera bele uza ba tinan naruk,” Liborio akresenta.
Suku Buruma iha tinan-2023 hetan alokasaun orsamentu hamutuk $159.318 hodi implementa atividade UNP faze daruak, husi montante orsamentu ne’e fahe ba kustu infraestrutura hamutuk $153.306 no kustu administrasaun hamutuk $6.012.
Jornalista : Natalino Belo
Editór : Evaristo Soares Martins
