AIFAESA hala’o inspesaun produtu iha Baucau
BAUCAU, 01 agostu 2024 (TATOLI) – Autoridade Inspesaun no Fiskalizasaun ba Atividade Ekonómika Sanitáriu no Alimentár (AIFAESA-Institutu Públiku) kinta ne’e, hala’o atividade inspesaun ba produtu iha munsípiu Baucau.
Diretora Departamentu Operasionál AIFAESA, IP, Claudina Soares Pinto, esplika, atividade referida parte serbisu regulár hanesan liuhusi inspesaun foka ba produtu importadu hanesan data produsaun ne’ebé liu prazu no kontrolu sasán sira tanba bandu atu fa’an iha territóriu.
“Ami tenke halo inspesaun regulár atu garante estabelesimentu sira-ne’ebé mak operasionál tantu iha nasionál no munisípiu tuir padraun ne’ebé seguru ba produtu sira,” Diretora Departamentu Operasionál AIFAESA, IP hateten iha Vila Nova, kinta ne’e.
Objetivu husi inpesaun mak identifika produtu importadu tanba bainhira produtu hirak-ne’e liu prazu kuandu fa’an husi operadór sei fó impaktu direita ba kompradór sira.
AIFAESA hala’o inspesaun bazea ba dekretu-lei númeru 26/2016, alterasaun dahuluk dekretu-lei númeru 29/2023 ne’ebé fó póder atu ezerse funsaun hodi defende direitu konsumidór sira ba kualidade produtu importadu iha territóriu nasionál.
“Ita konsege prende (halo apreensaun) produtu alimentár-sira no la’ós-alimentar ne’ebé fa’an liu ona prazu iha loja balun, ne’e sai ona lisaun atu futuru sira labele komete tán aktu hanesan nee,” Claudina Pinto akresenta.
AIFAESA rasik durante halo inspeksaun hetan apoia husi Autoridade Munisípiu Baucau no Komandu Polísia Nasionál Timor-Leste (PNTL) munisípiu Baucau durante semana ida hodi rezulta halo aprensaun ba produtu ne’ebé konsideradu liu prazu.
AIFAESA sei kontinua relata relatóriu inspesaun ba departamentu jurídiku antes hato’o ba dirijente hodi fó-sai sansaun administrativa ba operadór-sira bazea ba regulamentu AIFAESA númeru 43/2023 ante halo destruisaun ba produtu hirak-ne’e.
Jornalista : Natalino Belo
Editór : Evaristo Soares Martins
