BAUCAU, 02 agostu 2024 (TATOLI) – Komandu Polísia Nasionál Timor-Leste (PNTL) munisípiu Baucau, detein ona suspeitu ba krime omisídiu ne’ebé akontese iha suku Uatuhaco, postu administrativu Venilale, munísipiu Baucau.
Maske PNTL Baucau suspeita ona autór maibé parte polísia seidauk bele fó-sai motivu hosi krime tanba sei investiga hela.
Autór ba kazu refereda mane ho inisiál AHJ tá vítima nia kakorok ho inisiál JL idade 33 bainhira hetan iha dalan hafoin sosa sigarru iha área besik semtériu Dero-Ana Kaikoli, suku Uatuhaco iha loron, 01 fulan-agostu.
“Akontesimentu horikalan kazu úniku, ita-nia Polísia to’o iha fatin halo pasa revista, informasaun ne’ebé ita simu vítima mate tanba hetan tá,” Komadante PNTL Munisípiu Baucau, Superintendente Xefe Antoninho Mauluta hateten iha Vila Nova, sesta ne’e.
Suspeitu AHJ profisaun nu’udar badaen no halo serbisu konstrusaun uma iha aldeia Uaikana, nune’e tuir dalan atu fila ba hela fatin hasoru vítima iha dalan direitamente tá kakorok hodi rezulta JL lakon vida.
PNTL eskuadra postu Venilale to’o iha fatin akontesementu hodi halo identifikasaun hodi kontinua kaptura suspeitu iha nia hela fatin no kontinua ba prosesu investigasaun iha komandu PNTL Baucau.
“Ami sei halo prosesu investigasaun, inklui sei foti evidénsia ne’ebé hetan iha fatin akontesimentu hanesan motorizada ne’ebé vítima uza no katana ne’ebé suspeitu uza hodi tá vítima,” Mauluta akresenta.
Suspeitu deskonfia envolve iha membru organizasaun arte-marsiál no oras ne’e detein iha sela Komandu PNTL Baucau hodi hein prosesu kontinuasaun molok entrega ba Ministériu Públiku hodi tuir prosesu iha Tribunál Distritál Baucau.
Jornalista : Natalino Belo
Editór : Evaristo Soares Martins
