DILI, 06 agostu 2024 (TATOLI) – Prezidente Repúblika, Jose Ramos Horta, tersa ne’e hasoru malu ho delegasaun estudante Church of God University Student Volunteers (ASEZ), husi Korea Súl, hodi ko’alia kona-ba sira-nia “Projetu Rekuperasaun Rai” ne’ebé hala’o hela iha nasaun ne’e.
Iha sorumutu ne’e, ASEZ nia pedidu ba endosu prezidensiál ba sira-nia inisiativa ambientál, ne’ebé agora daudaun ativu iha munisípiu Lautem no Dili.
“Ami mai hasoru malu ho Prezidente Repúblika hodi husu nia apoiu no hanoin balun kona-ba ami nia programa hodi salva ekosistema ne’ebé mak komesa aat ba-bebeik iha Timor-Leste ,” Membru ASEZ Norbertinha da Costa hateten hafoin remata enkontru ho Xefe Estadu.
Nia dehan, Prezidente Repúblika apoiu másimu ba projetu ne’ebé mak ASEZ halo tanba kontribui ba hadi’a ekosistema Timor-Leste.
“Ami nia atividade mak hamos foer sira hanesan plastiku, iha fatin fatin, Dili laran no mós Munisipiu, ami mós iha ativiade kuda ai-oan atu halo rai bokur no matak,” nia dehan.
Tuir nia, atividade ne’e ASEZ halo ona iha territoriu nasionál kona-ba hamoos foer, kuda ai-oan no hahú hosi Munisipiu Lautem.
“Ami nia sentru iha Korea Súl, no estudante sira husi Korea maka mai hodi hala’o atividade ne’e, depois sira sei fila fali, maibé ami nia oficce mós iha Timor-Leste, apoia husi Korea. Tinan ida ne’e apoiu husi Korea dalarua ona,” nia tenik.
Projetu Rekuperasaun Rai, ne’ebé lidera husi ASEZ, envolve liuliu esforsu rekuperasaun rai, inklui kuda ai-horis no atividade hamoos lixu plástiku. Grupu voluntáriu aprezenta sira-nia realizasaun to’o agora no trasa sira-nia planu atu habelar projetu ne’e ba munisípiu hotu-hotu iha Timor laran tomak, hodi buka Prezidente nia apoiu ba objetivu ambisiozu ida-ne’e.
Durante enkontru, Prezidente hato’o interese maka’as ba projetu ne’e nia poténsia hodi hasoru dezafiu ambientál sira iha Timor-Leste.
Prezidente subliña importánsia atu habelar ámbitu sira-nia intervensaun nian, hodi enkoraja ASEZ atu esplora área adisionál sira iha ne’ebé sira-nia esforsu bele fó impaktu signifikativu, haree ba lakuna ambientál sira ne’ebé eziste iha nasaun.
Prezidente nia resepsaun pozitivu ba Projetu Rekuperasaun Rai fó sinál potensiál aumentu apoiu ba inisiativa ambientál sira iha Timor-Leste.
Enkontru ne’e konklui ho ASEZ ne’ebé otimista kona-ba espansaun futuru ba sira-nia projetu no ninia papél iha promosaun sustentabilidade ambientál iha nasaun tomak.
ASEZ maka grupu voluntáriu estudante universitáriu sira ne’ebé organiza eventu no atividade sira hodi hatán ba nesesidade urjente sira iha komunidade sira iha mundu tomak.
Nu’udar líder sira iha futuru, ASEZ halibur estudante sira, komunidade sira no Governu sira hodi kria mudansa ne’ebé loos no dura liuhusi Movimentu SAVE. Servisu ASEZ nian akontese iha nasaun oioin liu 175.
Jornalista: Hortencio Sanchez
Editór: Florencio Miranda Ximenes
