BAUCAU, 07 agostu 2024 (TATOLI) – Motorista transporte públiku mikrolete F2 diresaun Baucau Vila ba Tiriloka tenta halo asaun violénsia seksuál hasoru sidadaun estranjeiru iha suku Ostiku, postu administrativu Vemasse, munísipiu Baucau.
Motorista ho inisiál EMDS idade 26 nu’udar motorista mikrolete públiku tenta halo asaun seksuál bainhira tula pasajeiru estranjeiru inisiál JS idade 22 husi merkadu Vila Nova diresaun Triloka, maibé to’o iha fatin destinasaun suspeitu hamutuk ho ajudante obriga vítima pasiar tanba hakarak lori haree fatin to’o iha suku Ostiku hafoin pasajeiru seluk hamamuk iha Triloka.
Suspeitu hahú halo asédiu seksuál hasoru vítima hafoin EMDS haruka ajudante tún kompra pulsa telefone no sigarru hodi husik hela iha kioske nune’e durante viajen fila husi Ostico EMDS aproveita tempu tenta hakuak no lamas JS nian isin iha karreta laran to’o área suku Triloka, neebe JS tuur iha kadeira karreta oin.
“EMDS komesa halo manobras lamas-lamas, nia loke rasik nia korrente hatudu nia sasán sira-ne’e ba alin feto nee to’o tanis,” Komadante Polísia Nasionál Timor-Leste (PNTL) Munisípiu Baucau, Superintendente Xefe Antoninho Mauluta hateten iha Vila Nova, kuarta ne’e.
EMDS rasik hafoin halo asaun má edukadu konsege hatun hela vitíma iha fatin destinasaun no JS kontinua to’o iha Autoridade suku Triloka hodi hato’o keixa ba Ofisiál Polísia Suku no kontinua prosesa kazu referida iha Komando PNTL Baucau mesmu autór husu ona deskulpa.
“Agora ita halo identifikasaun, prosesu la’o ona, hein investigasaun prepara dokumentus resjistu iha Ministériu Públiku,” Superintendente Xefe Antoninho Mauluta akresenta.
Vitíma JS nu’udar sidadaun estranjeiru husi Nasaun Estadu Unidu Amérika (EUA) liuhusi misaun Korpudapas hanesan voluntáriu sai manorin lian inglés Sentru Formasaun Dezenvolvimentu Komunitariu (CDC, sigla portugés) iha suku Triloka.
Jornalista: Natalino Belo
Editór : Evaristo Soares Martins
