PNTL Baucau suspeita autór kazu agresaun fíziku iha Mulia
BAUCAU, 07 agostu 2024 (TATOLI) – Komandu Polísia Nasionál Timor-Leste (PNTL) munisípiu Baucau suspeita autór na’in-haat relasiona ho kazu agresaun fíziku iha suku Mulia, postu Administrativu Quelicai, munisípiu Baucau.
Kazu referida akontese iha oras 11:00 meudia, loron 04 fulan-agustu bainhira autór na’in-haat ho kondisaun lanu baku vítima inisiál HAC nu’udar membru ativu iha instituisaun FALINTIL-Forsa Defeza Timor-Leste (F-FDTL) bainhira tula fatuk britas iha fatin akontesimentu.
“Momentu ne’e ita ba foti suspeitu na’in-haat mesak idade nurak de’it, sira baku ita-nia forsa ida husi J2 depois veteranu,” Komadante PNTL Munisípiu Baucau, Superintendente Xefe Antoninho Mauluta hateten iha Vila Nova, kuarta ne’e.
Autór sira ho kondisaun lanu, hodi hamosu diskusaun hodi obriga vítima atu sosa fatuk britas maibé vítima rezeita, tanba halo ona kontratu ho na’in ba britas seluk nune’e suspeitu sira baku vítima rezulta kanek iha liman loos no karuk inklui bubu iha parte oin.
PNTL Baucau konsidera suspeitu sira planeia hodi baku vítima tanba liuhusi investigasaun fó-sai iha suspeitu na’in-ida bolu vitíma ba uma antes na’in-tolu seluk tuir hodi hamosu agresaun fíziku.
“Posesu hotu tenke avansa, tanba agora sei lao hela,” Superintendente Xefe Mauluta akresenta.
Suspeitu na’in-haat ba kazu agresaun fíziku referida ne’ebé PNTL Baucau identifika hanesan inisiál JF ho idade 19, IPM idade 18, TAC idade 19 no RC ho idade 20.
Jornalista : Natalino Belo
Editór : Evaristo Soares Martins
