DILI, 09 Agostu 2024 (TATOLI) – Ministériu Agrikultura, Pekuária, Peska no Floresta (MAPPF) kostrui, iha tinan ne’e, klínika animál rua iha Fohorem-Covalima no Uatulari-Viqueque ho montante osan rihun $53. Ho konstrusaun klínika rua ne’e, ministériu iha ona klínika animál hamutuk 18 iha munisípiu sira.
“Klínika rua ne’e nia prosesu remata hotu ona ho orsamentu ne’ebé prevee hamutuk rihun $53”, Diretór-Jerál Pekuária no Veterinária, Carlos António Amaral, dehan ba Tatoli iha Comoro, ohin.
Nia esplika katak agora hein de’it tékniku sira husi ministériu no empreza sira bá halo verifikasaun iha baze, nune’e bele hahú ona prosesu konstrusaun. Dirijente ne’e salienta katak klínika animál iha Covalima aloka rihun $30 no Viqueque rihun $23.
“Agora, ministériu tau osan hodi aumenta tan klínika foun rua ne’e atu reforsa klínika sira ne’ebé antes ne’e iha ona, nune’e númeru klínika ne’e sei aumenta ba 18 hodi reforsa tan servisu médiku animál sira iha kada munisípiu atu halo atendimentu ba problema animál sira ho efetivu no lalais”, nia realsa.
Responsavel ne’e esplika katak konstrusaun klínika animál iha munisípiu sira ne’e bazeia ba númeru populasaun animál no haree mós ba rekursu umanu, signifika klínika ne’ebé konstrui iha postu sira iha munisípiu ne’e tanba animál barak.
Nia salienta katak klínika ne’e harii atu responde lalais ba komunidade nia animál hanesan asu, busa, lekirauk sira ne’ebé maka enfrenta moras ruma, nune’e bele hetan tratamentu hodi asegura sira-ninia imunidade husi vírus sira.
“Klínika ne’e ita harii iha postu administrativu ne’ebé ita konsidera nia númeru animál barak liu, inklui rekursu umanu sufisiente atu lori animál sira mai klínika, tanba ne’e ita la harii iha postu hotu iha munisípiu ne’ebé nia númeru populasaun animál uitoan”, nia reitera.
Jornalista: Tomé Amado
Editora: Maria Auxiliadora
